The University of Miami pawlin cet motor te hmangin tipi hnuailam ah zingzoinak an tuah ih hmun ṭihnung um zet an hmusuak. Egypt khua kiangih um tipi sen (Red Sea) zialphah ah thihnak hmun pakhat an hmusuak, tipi sen cu Moses le Israel mipi pawlin an rak tan zo.
Tipi sen zialphah hmun ṭihnung zet ahhin ngate, ramnung zianghman an um thei lo. Himi sungih an va lut veten an cang thei nawn lo ih an thi cih, a taksa khal a siat thei lo. Hitawk hmun ah cangai thi an hmu ih a thihnak hi kum 8 a rei zo nan a siat cuang lo.
Zingzoitu Professor Sam Purkis in, “Hitawk hmun ah ngate, ramnung zianghman an lut thei lo. Oxygen zianghman aum lo, hitawk hmun ah ciihlawmpi aum ih a ṭihnung tuk. A al dan khal a mak tuk” a ti.
Tipi sen sung ahhin ngate, ramnung phunphun an tlangleng ih hmundang ih ngate le ramnung thawn an bangaw lo ih an danglam cuang. Ciihlawmpi umnak hmun cu nga pawlin an rawl hawlnak ah an hmang ṭheu, nga vanduai pawl cu ciihlawmpi umnak hmun ah an va lut ngah ih an thi. An ruak fen cu nga dang pawlin an rak ei ṭheu.
Leave a Reply