Tipikap Cepte Cu China In Mankhung Zetin An Lei Ruangah Cepte Hawltu An Tam

China company pawlin tipikap cepte (ကျောက်ဂျပိုး) cu mankhung zetin an lei ruangah nikhat hnu nikhat cepte hawltu an tam deuhdeuh. Kachin State, Putao ramsung ahcun tipikap cepte hi nasa zetin an hawl ciamco.

Cepte hawltu Ko Tan Shin Fon in “Nikum aiin a man a ṭha sawn, cawhnawi burkhat ah Kyats 7000, 8000, 10000 zatin an lei. Kiangkap um pawlin hizat man in kan ei thei lo, China ram ah an kuat thluh.

Cepte hawltu kan tamtuk ruangah Mulashidi lilawn kiangah cun puaipi pakhat vek a si. Innsang member 5 ih hawltu pawl cu nikhat ah cawhnawi bur 3 tla an ngah thei” a ti. Himi cepte pawl hi tisung, lungto hnuai le zanlam ah tipikap ah an um ṭheu.

A tum le a te an um ih a te pawl hi a mankhung sawn, a te pawl cu pikhat ah Kyats 130,000 hrawngin China company pawlin an lei. Cepte nunglai hi a thi aiin an kg a rit sawn, cepte hawl cu hnaṭuan pakhat ah an ruat ih het leh chet tin an hawl ciamco.

Kumdang ahcun kiangkap um pawlin himi cepte hi hnakphek thawn an phawng ih an rak ei ṭheu, a rim hi a hang tuk. A thawhdan cu nannan vek an ti.

Tualsung mi pakhat in, “Nikum aiin tuikum ah cepter hawltu an tam, khawtin ah cepte hawltu an tam deuhdeuh ruangah cepte hmuh ding khal a har tuk zo. Kan khua kiangkap tiva ah cepte an hawllonak aum nawn lo. Nikum ahcun December thla sung tiang kan hawl thei lai nan tuikum ahcun tu’hi an cem duado zo” a ti.

Be the first to comment

Leave a Reply

Your email address will not be published.


*