Tisartan Tumpi In Indonesia Pacang A Deh

Indonesia pacang kum 45 mi Samsul cu July 19, 2022 sun ah an khua kiang tiva ah nga le kaikuang a hawl rero laiah tisartan tumpi in a deh. Palik le khuasung mino pawlin an hawl ih nithum hnuah tisartan cu an kai ngah.

A hmaisa ahcun tisartan 13ft ih sau le 16ft ih sau pahnih an kai ngah. Siivai an dawt hnuah tisartan cu an luak ih minung ṭitsa an luaksuak lo ruangah Samsul dehtu an si lo ti an nenhnget.

Nithum hnuah tisartan tum zet an kai ngah, 26ft ih sau tisartan an kai ih siivai an dawt hnuah a luak ih Samsul ih titsa ṭhenkhat a luaksuak. Samsul dehtu ti an nenhnget ih a titsa ṭhenkhat cu a innsang pawl hnenah an hlan, Samsul in a nupi le a fale 3 a thihsan.

A rualpa in, “Himi tiva cu tisartan pawl ih innpi a si, tisartan an tamtuk. Palik pawl hi hawl bawm lo sehla cun buainak an tong ko ding” a ti. An khua kiang tiva ah tisartan tam zet an um ih minung an deh ṭheu. Thuneitu pawlin tiva ih feh an siang lo nan tiva hi kiangkap khuasung mipi pawl ih eihawlnak a si ruangah an feh ṭheu.

Be the first to comment

Leave a Reply

Your email address will not be published.


*