Tisartan Var

Tisartan thuhla rel tikah ramsa dum, ṭihnung um zet ara lang hngal. Asinan, US, Florida, Roger Williams Park Zoo ramsa hmuan sungah tisartan var an vulh.

A suah ihsin a vunrawng a var ih a mit a sen, Albinism timi damlonak a neih ruangah a hmuihmel langdan a danglam. “Frozen” zuknung sungih Queen Elsa sirhsan in a hmin ah Elsa tin an phuah, a vunrawng a danglam vekin tisartan dang aiin a cak lo sawn.

A harhdamnak cu a ṭha thluh tin ramsa sibawi in a rel. Tisartan dang vekin itthat cu a duh thei zet, Elsa ruangah an ramsa hmuan cu a lar phah ih zohtu khal an tam thei zet. An ramsa hmuan sungah rul var khal an vulh.

Ramsa hmuan kiltu Corrie Ignagni in “Ramlakah um sehla cun a thi zo, a hmuihmel a danglam ruangah tisartan dang pawlin an that ding. An that lo asikhallen a vunrawng a var ruangah rawl a hawl ve thei lo ding, a vunrawng ruangah sa a deh ve thei lo ding” a ti.

Tisartan ih an cahnak pakhat cu an mit thazang a cak tuk ti a si, asinan Elsa ih mit cu a sen ih a mit thazang khal a cak lo zet ti a si.

Be the first to comment

Leave a Reply

Your email address will not be published.


*