Kum 68 mi Masabumi cu Japan sumdawng milian le hnaṭuan sang zet kaitu a si. Russia ṭong thiam hminthang a si ih 1910 kum ah Russia ram ah a tlawng ih tlangleng lamzin an tuah. A tlunlam ah London khawpi a pal phah ih Titanic longpi to in a tlung.
April 15, 1912 zanṭim laiah Titanic longpi in vurhlawmpi a pah ngah ih a siat. Tipithuanthum ah Titanic longpi cu a pil rero, long to pawl cu ningṭih thlaphang in an ṭap, an rak ciamco. Longte thawn nunau, nauhak le tarcak lo pawl an thiarsuak.
An pasal, an pale pawlin mithli thawn an nupi fanau cu an thlahliam. Masabumi in nupi fanau pawl thawn ṭhen lai cu a hmu ih inn ih um a nupi le fanau pawl a mangsuak. An hrangah cakuat khal a ngan man. Cutin thihnak tipithuanthum ihsin a talsuak thei. Titanic longpi ihsin damsuak tin a hminthang zet.
Leitlun thuthang tinkim ah a thuhla cu an tarlang cece ih “Lucky Japanese Boy” tin an ko. Asinan, Titanic longpi ihsin damsuak midang in “Nunau vekin a tuah aw ih nunau le nauhak pawl ih to mi longte ah arak to ve ruangah a damsuak” an ti cu Japan mipi pawlin an hnawng.
“Samurai thinlung a nei lo” an ti, nunau le nauhak pawl hmaisa ah ret ding timi Japan nunphung a siatsuah tin an hnawng. Masabumi in Titanic longpi ihsin a damkhuasuah dan cu zohnen hman ah a sim lo. A hnaṭuannak ihsin khal an dawisuak, a innsang pawl khal mipi hmaiah mit an meng ngam nawn lo. March 14, 1939 ah kum 68 mi si in a thi.
Leave a Reply