Tlansuak Ve Thei Lo Pitar, Putar, Damlo Pawl Cu Innsang Ah An Ei Le In Ding Thawn An Kharhkhum, Ralkap In An Inn Thawn An Rak Urkang That Thluh

Ralkap in June 15 sun nazi 3:00 hrawng ihsin Magway Division, Pauk Township, Kinma khua ih inn pawl an urkang ciamco, zanlam nazi 4:00 ahcun an khua inn ṭhenthum ih ṭhenkhat cu a kangral thluh.

An khua ah ralkap tam zet an va lut ih khuasung mipi pawl cu an kap ih an hringhro ciamco ruangah ramlak ah an tlan, an relh.

Khuasung mi in “Ralkap pawl an ra lut veten kan tlan cih, Kyee Ngo Taung ih dalan pawl an that ruangah hitin an ra cangvai a si ding ti kan zum” a ti.

Zan khalah an inn pawl cu a kang rero lai, an inn sungah tlansuak ve thei lo pitar, putar, damcak lo pawl cu an tanta ih ralkap in an inn thawn an rak urkang cih.

Kum 36 mi khuasung mi in “Ka pi khal a tel, ralkap pawl an ra ti kan theih veten kan tlansuak. Tlansuak thei lo ka pi cu innsung ah kan tan, tuizan ei ding, thaisun ei ding rawl pawl cu kan tuahsak thluh cia ih inn lenglam ihsin tawh in kan kalh. Asinan kan inn an urkang ih ka pi khal a kang that” a ti.

Inn dang khalah pitar, putar, taksa damcak lole taksa zeng pawl cu innsung ah an khum ih ni 2/3 an ei ding rawl khal an tuahsak thluhcia. Asinan, ralkap pawlin an khuasen ih inn zaten an urkang sak ruangah an thi thluh ti a si. Minung paziat an thi ih hliam an tuar ti cu tu dinhmun ah an theithei hrih lo.

Be the first to comment

Leave a Reply

Your email address will not be published.


*