Rakhine State, Kyauktaw peng, Kun Oung Chaung khua ih um tlawng saya / sayamah pawl thlahlawh cu August 31, 2022 sun ah cazin kaitu in ava suah. Kyat ting 30 lenglo ava suah ih lamzin ah an lonsak thluh.
Kun Oung Chaung khua ih tlawnginn hmin cazin kaitu Daw Mi Mi Khaing cu zinglam nazi 11:00 ah saya / sayamah pawl hrang thlahlawh suah dingin a poksuak. Motor kethum nei pawl thawn Kyauktaw Education Commissioner’s Office ah ava feh.
A pasal ih unaupa U Maung Thein Shwe in, “Zinglam nazi 11:00 hrawngah an innkiang ih ding motor kethum nei pawl a sang ih saya / sayamah pawl hrang thlahlawh suah dingin fimthiamnak zung ah a feh. Thlahlawh a suah hnuah tlawng sayagyi hnenah a sim ta.
Motor kethum nei pawl hmangin a tlungsal ih lamzin ah zianghman a thei nawn lo. Bualrawn kiangah an hlon” a ti. Daw Mi Mi Khaing cu siivai ṭha lo, lungaa sii hmangin a sumpai pawl an laksak thluh. Sun nazi 1:00 hrawngah bike mawng pakhat in a hmu ih a luzing tuk lai, a rit tuk lai.
Siizung ah an phur ih zianghman a thei hrih lo. A luzung lai. Ziangvek motor kethum nei pawl a hmang, a mawngtu zo a si. A tlunlam ah ziangvek motor a hmang ti khal a rel thei hrih lo. Thu an sut nan a sim thei lo, a parih thilthleng hi thei nawn lo vekin aum.
Kun Oung Chaung tlawnginn ah saya / sayamah le hnaṭuantu 30 lenglo an um ih thlahlawh an nei nawn lo. Daw Mi Mi Khaing hi 2019 kum ihsin tlawnginn hmin cazin kaitu a si. Palik sakhan ah thubuai an va thehluh ih a sumpai laksaktu cu an zingzoi rero lai.
Leave a Reply