Tlawng Sayama Gyi Cu Hriamkai Pawlin An Kai, Thlakhat Lenglo A Thuhla An Thei Nawn Lo >>

Shan State, Naungcho Township, Kone Tim khua ih um primary school Sayama Gyi Daw Ei Thin Za Maung cu zo ti theih lo hriamkai pawlin an kai ih a thuhla an thei nawn lo.

Kan dung May 30 sun nazi 3:00 hrawngah tlawnginn sungah aum ih tlawngkai dingih hmin pe nauhak pawl hmin cazin a ngan rero. Cutawk ah Vigo motor var ava cawl ih hnipuan pangai hruh mi 5 mi in an va kai, an kaih laiah meithal khal an hmet puak.

A thuhla theitu U Chan Myae in, “Ralhrang in ramsung thuneihnak an lak pekte ahcun CDM a tuah, cumi hnuah an innsang harsatnak ruangah Non-CDM ah a lutsal. Tlawnginn sungah nauhak hmin pe pawl a ngankhum rero laiah an va kai, motor sungah mipa 4 le nunau 1 an um. Meithal veithum an hmet puak ih sayama cu an kai. Hohko lamah an hruai” a ti.

An kaih hnu ihsin tuini tiang a thuhla an thei nawn lo, an phone tlang thei nawn lo. A parah thil pakhat khat a thleng pang ding ti an phang zet ih a thuhla zingzoi dan ding khal an thei nawn lo.

Sayama Gyi Daw Ei Thin Za Maung hi Magway, Yenangyaung khuami a si ih Shan ram ah sayama ṭuan dingin ava feh, Shan ram ah kum 4 sung tlawng sayama a ṭuan zo.

Be the first to comment

Leave a Reply

Your email address will not be published.


*