Bago, Pyay District, Mawza khua ah phun 7 tlawngta in tlawnginn kiltu ralkap cu nam in a dawt. August 3, 2022 zinglam ah ralkap pahnih in tlawngin an kil, tlawngta nauhak in ralkap pakhat sawn cu nam in ava dawt ih a tlan.
Ralkap pakhat in meithal in a kap ih a dunglam ah a kap ngah, ralkap hliamtuar le tlawngta nauhak cu ralhrang pawlin an thiar ih tlawngta nauhak cu a thi zo’ tin an phuang.
Tualsung mi pakhat in, “Tlawngta nauhak ih hmin cu Archik a si, a nu cu Ann Tin San tin an ko. Sumdawngnak khal an nei lo, bazar kiangah an um. Tlawngta nauhak cu a thi zo ih a nu khal an kai” a ti. Hliamtuar ralkap Aung Min Miat cu a thi lo ih ralkap siizung ah an tuamhlawm rero lai. Tlawnginn a kilnak hi kumkhat hrawng a si zo.
Tlawnginn sungah buainak a thleng ruangah tlawnginn cu a langten an khar lawk ih zingzoinak an nei. Vengsung mi pakhat in, “Tlawngta nauhak in ralkap pawl a hua tuk. Inn ihsin nam a keng cia, tlawnginn kiltu ralkap pahnih lakah pakhat sawn cu nam in a pum ah ava dawt ih a tlan.
Ralkap pakhat in meithal in a kap ih a dunglam ah a ngah, a hliamhma kau khal a tum tuk. Hliamtuar ralkap le tlawngta nauhak cu ralkap pawlin an thiar. Ralkap cu ihkhun 500 umnak siizung ah an tuamhlawm, tlawngta nauhak cu aumnak kan thei nawn lo. Khuitawk hmun ah an hruai ti khal kan thei lo” a ti.
Leave a Reply