Sagaing, Kanbalu Township, Nat Inn khua ah ralhrang lamtang Pyu Saw Htee hruaitu pakhat in nunau nauhak kum 8 mi phunhnih kailai cu a kaihrem ih a pawngsual thu Mandalay Free Press – (MFP) thuthang sirhsan in theih a si.
Nat Inn tlawnginn ah ralhrang le Pyu Saw Htee 40 hrawngin umhmun an khuar. Nat Inn khua cu ralhrang lamtang khua pakhat a si ih Pyu Saw Htee an tam zet, tlawnginn khal an kil thepthep ruangah tualsung nulepa pawlin an fale cu hnangam zetin tlawng an kaiter.
June 6, 2022 sun ah pacang kum 53 mi U Shwe Ba (A pai hmin U Maung) in nauhak kum 8 mi cu hmun dangah a hruai ih a sualpi. Himi thuthang cu a darhlonak dingah ralhrang pawlin hliamtuar innsang hnenah ting 30 an pe ih daiten an umter. Nauhak pawngsualtu U Shwe Ba khal an vuak, an vel hnuah an kaih thu an tarlang.
U Shwe Ba hi nupi nei lai a si ih fanu 3 anei, ralhrang in ramsung thuneihnak an lak hlanah cun kuva hmuan tuah in eihawl a si. Ralhrang in ramsung thuneihnak an lak hnuah Pyu Saw Htee pawlkom ah a lut ih an hruaitu pakhat a si.
Nat Inn khua ih um Pyu Saw Htee pawlin an khua kiang lamzin ah khualtlawng sukso pawl hnenah sumpai an rak dil ṭheu, an ngahmi sumpai zemawk thuhla ah hmuhthuam awklonak a suak ih ralhrang pawlin thu an va ṭhensak zo.
Leave a Reply