Tlawngkai Dingih An Thlah Mi Nauhak (2) An Hlo

Shan State, Hwe Kyein khua te ih um unau hnih cu a nulepa in Mandalay peng, Pyin Oo Lwin ah tlawngkai dingin an thlah. An ramsung ah doawknak le Covid-19 aum ruangah Pyin Oo Lwin ah tlawngkai dingin an thlah ih sungkhat inn ah an um.

Kum 10 mi Maung Lut Kham le kum 12 mi Maung Sai Kyaing cu ‘Wa’ miphun an si ih Kawl ṭong an thiam lo. June 3, 2022 sun ah Pyin Oo Lwin ih an sungkhat inn ah an va thlah, June 8 ahcun inn ihsin an suak ih an hlo lanta.

An sungkhat in, “Tlawngkai dingin Pyin Oo Lwin ah an va thlah, khua ahcun nan theih veten tlawngkai a theih lo. June 3 ah an va thlah ih ni 7 tiang cu phone ihsin an bia’aw ringring thei. A hlan ahcun anmah khalin tlawngkai an duh, Pyin Oo Lwin an thleng hnuah an tlung duhsal. Inn kan tlung duh an ti ṭheu.

A pa in kumkhat tal cu um uhla. Asilolen thla 3 tal um uhla kan ra lo hruaisal ding, Kawl ṭong tal nan thiam ahcun a tawk, nan rualpi pawl khal Yangon lamah tlawng an kai ih Kawl ṭong an thiam thluh zo’ a ti. June 8 zanriah khawh hnu ahcun room sungah an um nawn lo, an hmuanchar khalah an hawl nan an hmu lo” a ti. Khuitawk hmun ah an feh ti an theih lo ruangah an innsang pawl cu an thinhar zet.

Be the first to comment

Leave a Reply

Your email address will not be published.


*