Tlawngkai Lai Nauhak Kum 8 Mi Le Kum 5 Mi Cu Motor In A Rial That, Motor A Tlanhlo

Rakhine State, Maungdaw Township, Shwe Baho khua ih um nauhak kum 8 mi le nauhak kum 5 mi cu December 23, 2021 sun nazi 12:45 hrawngah motor in a rial that. Unau hnih an si ih upatu cu nunau Ma Chan Nu a si ih phun 2 a kailai, a nau mipa cu Maung Tun Tun Naing a si ih KG a kailai.

December 23 zingah tlawng an kai ih suncaw ei caan nazi 12:00 luan ah an tlawnginn kiang dawr ah hmuk an va lei ih an kir lamah motor in a rial that.

Khua lal U Tun Tun in, “Suncaw ei caan ah an unau hnih in dawr ah hmuk an va lei ih dawr ihsin an kirlam ah motor in a pah that, ziangvek motor in a pah that ti cu zohman in an rak hmu lo. Hmuk dawr ih um pawlin thilphur motor pakhat a tlan lai an hmu thu an rel, dawr le nauhak pahnih an thihnak hmun hi pi 50 hrawngin a hla. Nunau sawn ih lu cu a sia tuk lawmman, mipa sawn ih lu khal a kuai. A hmun ah an thi veve” a ti.

Motor in a pah thatnak lamzin hi motor lamzin ngai a si lo, khua ihsin tlawnginn fehnak lamzin a si. Motor tlannak lamzin cu tlawnginn dunglam ah aum tin an khua lal in a rel. Mithi ruak pahnih cu siizung ah an phur ih zohdiknak an nei rero lai, nauhak pahnih rial thattu khal ṭuanvo neitu pawlin an hawl rero lai.

Be the first to comment

Leave a Reply

Your email address will not be published.


*