Tlawngta Nauhak 13 A Sualpi Ih 9 In Nau An Pai

Indonesia tlawng saya in tlawngta nauhak 13 a sualpi ih 9 in nau an pai hnuah nau an nei. Kum 36 mi Herry Wirawan cu sakhua saya Islamic boarding school ah zirhtu a ṭuan, 2016-2021 kum sungah tlawngta nauhak kum 12-16 mi pawl cu arak itpi ṭheu.

Tlawnginn sung, hotel le inn ah a hruai ih a sualpi. A tlawnginn ih nauhak pawl cu khuate lam, innsang harsa zet ihsin tlawng va kai pawl an si. Indonesia ram mipi pawl hi an harsa zet ruangah sakhua tlawnginn ihsin tlawngkai khal an tam zet. Cumi lakah zirhtu umṭha duh lo khal an tam ruangah buainak an nei ringring.

Tuahmawh tong innsang lam in an relsuak ngam lohli lo, tlawngta nauhak pakhat cu an inn ah ava tlung ih nau aneih hnuah a nulepa in palik hnenah taza an cuai. Cumi hnu ihsin zirhtu Herry cu palik pawlin an kai ih a sualtuahmi pawl an phosuak.

Zirhtu Herry khalin a sirawk thu a rel ih tlawngta le an innsang pawl hnenah ngaihthiam a dil. Khuasung mipi pawlin thihdaan orhter dingin an dil nan Human Right pawlkom in an duh lo, curuangah damsung thawngtla dingin a thu an ṭhencat cu tuahmawh tong innsang pawl an di a riam lo tuk ih “Pathian in thuṭhen leh hram seh” an ti.

Tlawngta nauhak pawl ih fa cu The Children and Women Protection Agency pawlin an la ih an kilkhawi. Tuahmawh tong innsang pawl cu an ram cozah in zangnadawmnak pe dingin a tawlrel rero lai.

Be the first to comment

Leave a Reply

Your email address will not be published.


*