Tlawngta Nauhak 13 Pawngsual Ih 8 Nau Raihtu Saya Cu Thihdaan An Orhter

Indonesia tlawng saya pakhat in a kilkhawimi nauhak 13 a pawngsual hnuah 8 in nau an keng. Indonesia ramsung ah Islamic boarding school hi a tam zet, sakhua tlawnginn ah innsang harsa pawlin an fale pawl cu tlawng an va kaiter ṭheu.

Tlawnginn ah nauhak pawl cu an um cih. 2016-2021 kum sungah nauhak 13 arak sualpi ṭheu, ṭhenkhat cu a sualpitnak ah hliamhma an tuar. A sualpimi nauhak pawl cu kum 12 ihsin kum 16 karlak mi an si, tlawngta nauhak pawl cu innsang harsa ihsin tlawngkai an si vekin an relsuak ngam lo.

Ṭhenkhat cu an ningzak ruangah an relsuak ngam lo. Tlawngta nauhak pakhat cu tlawng cawlh caan ah an inn ah ava tlung ih nau a hring, a nulepa in palik hnenah taza an cuai. Tlawng saya ih thuhla cu an zingzoi vivo ih tlawngta nauhak 13 a tuahmawh thu an theifiang.

Nauhak 9 in fa an nei ih an fale pawl cu The Children and Women Protection Agency in a kilkhawi sak. An upat tikah an dinhmun in a pe asilen hringtu nu hnenah an pe kirsal ding. Tuahmawh tong innsang pawl cu cozah in bawmnak a pe ding.

Tlawng saya cu nikum 2021 May ah palik pawlin an kai ih February 2022 ah damsung thawngtla dingin a thu an ṭhencat. Hremnak an pekmi cu mipi in an duhlo tuk ruangah duhphorhnak an tuah, tlawngta nauhak lakah misual an tam deuhdeuh ding an ti. Curuangah court in a thuhla cu a buaipi sal ih April 4, 2022 ah thuṭhentu in, “A sual man ah a thi ding, thihdaan thawn hremnak pek a si” a ti.

Be the first to comment

Leave a Reply

Your email address will not be published.


*