Tleirawl Kum 15 Mi Cu An Pawngsual Ruangah Thahawk A Tum

Shan State, Namtu Township, Panlong khua ih um tleirawl kum 15 mi cu pawngsual a tong ruangah a thinna, a ningzak tuk ih putatsii in in thahawk a tum. Ta’ang National Liberation Army (TNLA) ralkap pakhat thawn an rualpi ṭhaawk hnuah an duhaw.

January 23, 2022 zingah a tlangval (TNLA ralkap) in a duhlo nacingin a sualpi. An sungkhat in, “Ahlan khalah TNLA ralkap cu an inn ah a lut/suak ringring, mino an si ih an nel’aw zet. January 23 zinglam nazi 9:00 hrawngah ralkap cu an inn ah ava leng ih innsung ah a nulepa an um lo.

Nunau duhlo nacingin a sualpi, a sualpi laiah a au ciamco ih innhnen pawlin an va zoh cu a sualpi ti an thei. Vengsung mipi pawl an pungkhawm hngal ih an kai” a ti. TNLA ralkap cu khuasung mipi pawlin an kai ih an pule hnenah an sim thei, an pule pawlin mi pawngsualtu ralkap cu an va hruaisuak ih thubuai cu neta ah kan reltlang ding’ an ti.

An pule pawlin himi thuhla cu midang hnenah relsuak lo dingin khuasung mipi hnenah an cah. Himi thil a thleng hnuah tleirawl te cu a ningzak, a thlatem tuk ruangah January 25 sun ah putatsii a in ih amah le mah thahawk a tum. Asinan a talbuai laitak ah a nute in ava hmu man ih siizung ah an tlanpi, a nunnak cu an runsuak man.

An sungkhat in, “Kan naunu cu a ningzak tuk ruangah putatsii in in a thataw tum, asinan a nute in a caan khelin arak hmu man ruangah a nunnak cu kan run man. Tu’ahcun amah lawngin kan umter ngam nawn lo. Thahawk a tumsal ding kan phang ruangah kan kil ringring” a ti.

Himi thuhla ah TNLA thuphuangtu Major Ta Aik Kyaw cu media pawlin thu an sut ih, “Himi thilthleng cu a cipciar in zianghman ka thei hrih lo. Himi thil a thlennak hmun hi pehtlai awknak a har zet, thilthleng cu kan zingzoi rero lai. Thilthleng ngai asilen sualtuahtu ralkap cu napin hremnak kan pe ding” a ti.

Panlong khuasung ah TNLA ralkap pawlin umhmun an khuar ih rawldawr ah rawl an va ei ṭheu, asinan an rawlei man cu an pe dah lo ih khawlal le khawtlang upa pawl an pekter. Thilzuar pawl hnenah sumpai an khong ṭheu ih khuasung mipi thilri cu an duhduh in an hmansak hnuah an pe kirsal nawn lo, a neitu in an va hlam sawn ih ṭhenkhat bike cu an rak hmang siat nan a tuah man khal pe loin an um lanta.

Tualsung mi pakhat in, “Panlong khua cu TNLA pawlin an ukbet, khuasung mipi pawl hi an hmuhsuam. Khuasung mipi pawlin an ṭih tuk ruangah zianghman an relsuak ngam lo, an hek ngam lo. TNLA pawlin khuasung mipi pawl cu an hringhro ṭheu, an thinlung ah ṭihnak nei dingin an tuah” a ti.

Himi thuhla ah TNLA thuphuangtu Major Ta Aik Kyaw in, “Kan ralkap pawlin an lo hmuhsuam, minung covo an siatsuah asilen hmaiton in siseh, phone khalin in sim thei ringring” a ti.

Be the first to comment

Leave a Reply

Your email address will not be published.


*