TNLA Pawlin Rawldawr Ah Rawl An Ei Ih A Man An Pe Dah Lo, Khua Lal Hnenah An Dilter Ṭheu

Shan State, Namtu khua ih rawldawr ah TNLA pawl cu rawl an va ei ṭheu ih an rawlei man an pe dah lo, an rawlei man cazin cu an khua lal hnenah an pekter ih an khua lal in arak peksak thluh ṭheu.

Thuhla theitu in, “Namtu ramsung ah TNLA ralkap ṭhenkhat pawl umhmun an khuar, khuasung ih rawldawr ah rawl an va ei ṭheu ih an rawlei man cu khawtlang upa pawlin an peksak ringring” a ti. TNLA ralkap pawl khalin an rawlei man cu an pe lo ih an hminsinter hnuah a man cu an khua lal hnenah an va dilter ṭheu.

Thuhla theitu in hitin a rel bet, “Dawr neitu pawl khalin ziangtin hman an ti ngam lo, an rawlei man cazin kengin khua lal hnenah sumpai an va dil ṭheu. Khua lal pawl khal thupek an dawngcia maw si ding, dawr neitu in sumpai an va dil tinten an rak pe ṭheu” a ti.

Khua ṭhenkhat khalah TNLA pawl cu diklo zetin an cangvai ih mipi in tlunlam upa hnenah an hek duh tuk nan an nunnak hrang an ṭihphan ruangah daiten an umsan thu media hnenah an sim thei.

Hmin tarlang remlo tualsung mi pakhat in, “Ṭhenkhat khua ahcun TNLA pawlin khuasung mipi motor le bike hi alakin an hmangsak ṭheu, an hmang laiah a siat asikhallen an tuahṭha nawn lo ih an pe kirsal nawn lo. Motor/bike neitu pawlin an va lasal ṭheu, mipi in an ṭih ruangah zohnen hmanah an sim ngam lo” a ti.

Namtu ramsung khua ṭhenkhat ah TNLA hriamkai pawlin khuasung mi an kai ih an hrem ṭheu ruangah diklo zet ih an cangvaihnak cu mipi in an relsuak ngam lo.

Be the first to comment

Leave a Reply

Your email address will not be published.


*