Tuiṭum Thawngtla Pawl An Suah Zalennak Ah Damlo, Tuamhlawm Ṭul Tuk Mg Lwe Phyo Aung A Telve Lo

June 30 sunah ralkap in thawngtla pawl an suah zalen, CDM tuah cozah hnaṭuan, lawyer, thuthang latu ṭhenkhat cu an suah lo. Kachin pacang pakhat khal a fanu neihsun an suah ve lo ruangah lungkuai in a thih phah.

Magway thawnginn ihsin thawngtla 26 an suah, mipa 23 le nunau 3 an si. Magway thawnginn sungih an khummi damlo, Mg Lwe Phyo Aung an suah ve lo ruangah hringtu a nu cu a thinhar tuk.

Tlangval kum 22 mi Lwe Phyo Aung cu engineer tlawngta a si ih ralkap cozah duh loin lamzawhnak ah a tel ṭheu. March 27 sun lamzawhnak ah a tel ih ralkap pawlin an rak kap ciamco, Lwe Phyo Aung cu an kap ngah hnuah nasa zetin an vel ciamco.

A innsang pawlin siizung ah an tuamhlawm ih a kut hliamhma tuar a bese tuk ruangah sibawi pawlin an tansak, cun a ke khalah hliamhma a tuar ih a mit khal operation tuah ṭul dinhmun a si.

Siizung aum laiah ralkap pawlin pukmah 505 in thubuai an orhter, June 7, 2021 sunah siizung ihsin a suak thei ih a suah hlante ah ralkap pawlin an va hruai ih thawnginn sungah an khum.

A upa in “Siizung ihsin kan suak zik zawngah ralkap pawlin an ra hruai. A dam ṭha hrih lo ih siivai thawn tuamhlawm ringring a ṭul lai nan kan tuamhlawm thei nawn lo ding ruangah a sehherh um tuk” a ti. Thawnginn sungah ziangtin aum ti khal theih a si nawn lo.

Be the first to comment

Leave a Reply

Your email address will not be published.


*