Tuisun Hi Salai Tin Maung Oo A Thihcam A Si, A Ṭongkam Netabik “Ka Taksa Cu Nan That Thei Ding Nan Ka Lungthlitum Cu Nan That Thei Lo Ding”

Salai Tin Maung Oo cu Chin paralṭha a si, hringtu a pa cu Tatmadaw officer hlun a si ih a nu cu nurse a si. Myanmar ramsung thuneihnak cu ralkap hotu Ne Win in a lak ruangah tlawngta pawlin an dodal, hriamkai in an do ih Salai Tin Maung Oo cu tlawngta pawl hotu pakhat a si.

Ralkap pawlin an kai ih Insein thawnginn sungah an khum. Hringtu a nulepa, a unau pawl khal an kai thluh ih thawnginn dangdang ah an khum. Salai Tin Maung Oo cu a ramkhelnak ihsin a cawl ih ralkap cozah a do nawn lo asilen an suah zalen ding thu an sim nan a duh lo.

June 26th 1976 zinglam nazi 4:00 ah hridai in an thlai that, an thlai that hlanah a thinlung a thleng danglam pang ah tin thu an sutsal ih. Salai Tin Maung Oo in “Ka taksa cu nan that thei ding, asinan ka lungthlitum cu nan that thei lo ding. Ralkap ke hnuaiah ka kun dah lo ding” a ti.

Tlawngta an kaihmi lakah Salai Tin Maung Oo lawng an thlai that. Tuisun June 26 cu Salai Tin Maung Oo ih thihcam kum 45-nak a si. A nulepa khal kum 5 sung veve thawngtla dingin an thu an ṭhencat ih a unau pawl khal kum 7 sung thawngtla dingin an thu an ṭhencat.

A u Mya Tin cu thawnginn sungah a ke an tansak, a ke ah hliamhma a tuar ih thawnginn sungah an tuamhlawm lo ruangah an tansak. Cumi hnuah Mya Tin cu an suah zalen, Mya Tin in “Tatmadaw officer hlun ih fapa Salai Tin Maung Oo in ralkap cozah a dodal ruangah Ne Win cu a thinheng tuk” a ti.

Cun hridai thawn an thlai thatnak khal tlangpar miphun Chinmi a si ruangah a si ding a ti. Salai Tin Maung Oo ih nulepa, unau pawl cu thawnginn ihsin an suahsal ih nunhram thar in an khuasa ruangah an harsa zet.

All Burma Federation of Student Unions in “Salai Tin Maung Oo in rampi zalennak ngah dingin ralkap cozah a do, Chin miphun hrang lawngah ral a do lo. Myanmar rampi hrangah a nunnak a hlan, curuangah Salai Tin Maung Oo cu Burma democracy sualnak ih miralṭha, martyr tuartu a si” an ti.

Be the first to comment

Leave a Reply

Your email address will not be published.


*