Tulai Puaisa Pawlin Chin Fala Raltlan Pawl Cu Dubai Ram Lamah Hnaṭuan Dingin An Sawm Nasa, Dubai Ih Um Chin Fala In >>>

Dubai ram cu leitlun ih ram thangso le ram lian zet an si, Musilim rampi a si vekin nunau dinhmun cu a niam zet. Chin ramsung ah doawknak a nasat tuk ruangah khuasung mipi pawl cu raltlan in hmun dangdang ah an um. Cumi lakah puaisa pawlin Chin fala pawl cu Dubai ram lamah hnaṭuan dingin an rak sawm nasa.

Mindat khuami in, “Mipa aiin fala no tete pawl an duh sawn. Tulai ahcun Dubai ram ah mi hnenum hnaṭuan hi a lar zet. Puaisa pawlin sumpai neilo khalin an fehter thu an sim thei, an cemliammi zaten puaisa pawlin an ṭumsak tum. Hnaṭuan an ngah hnuah an thlahlawh, thla 4 man cu puaisa hnenah an pe kirsal ding.

Yangon an um sung khalah sumpai zianghman an cem lo dingih puaisa pawlin an ṭumsak thluh tum ruangah fala pawl khalin an ngaihven zet” a ti. Dubai feh tum pawl cu Yangon ah thla 6 hrawng an um lawk ding, Yangon an um sungih an ei le in man cu puaisa pawlin an ṭumsak thluh tum.

Dubai an va thlen hnuah exam an nei dingih exam ong pawl cu Department stores le building pawl thianfainak ah hna an ṭuan thei. An thiamthil ih zir’in hnaṭuan an ngah ding, exam ong lo pawl cu hnenum hna an ṭuan. Dubai ram ih um Chin fala pakhat in, “Kei cun a cang thei asilen ka Chinpi fala pawl cu hitawk hmun ah ra lo sehla ka duhsakpi. Hitawk ih mi hnenum hnaṭuan ding cu a harsa tuk, Dubai ram hi an sual zet.

Cun, Dubai puaisa pawl hi zum ding an um lo. Tulai hi Dubai ah hnaṭuan ding a har tuk zo, mi hnenum hnaṭuan tikah biaknak sakhua a bangaw lo thawn an ṭong thiam lo thawn cun a har tuk. Dubai ih hnaṭuan harsabik cu mi hnenum hi a si, thlahlawh cu hnaṭuan a ṭhah len thlakhat ah ting 6 kiangkap hrawng a si” a ti.

A hlan ahcun Chin mino pawl cu Thailand, Malaysia, Singapore le Macau lamah hnaṭuan dingin an poksuak ṭheu. Yangon ih um Chinmi pakhat in, “A cang thei asilen nunau pawl hi ramdang fehter ka duh lo. Asinan, ramsung ah an hrangah lamzin aum lo, tlawngkai pawl khal thinphang zetin an um.

Phun 10 kai pawl mino khal ziang tuah ding ti an thei lo, Sumpai nei deuh pawl cun Yangon ah ṭong an zir hnuah Singapore, Japan lamah an feh. Sumpai neilo pawl cu puaisa thawn tawlrel tlangin leiba thawn ramdang ah an fehsuak, leiba thawn fehsuak hi an tamtuk” a ti. Singapore ram ih feh pawl cu thla 6 sungah an feh man leiba an rulsal thei, Dubai ih feh pawl cu thla 4 sungah an rul. Mindat, Matupi, Falam le Kalaymyo kiangkap ih um mino tam zet cu ramdang feh dingin an tawlrel rero lai.

Be the first to comment

Leave a Reply

Your email address will not be published.


*