UK Pacang In A Nupi Thailand Mi A That Ih A Candip Hnuah A Hlon

2014 kum ah UK pacang kum 51 mi Shane in a nupi Thailand nunau cu a that ih a candip hnuah tiva ah ava hlon. May 31, 2022 sun nazi 1:30 ah a thuhla cu court in a relsak ih kum 8 sung thawngtla dingin le zangnadawmnak ah 12.5 million baht pe dingin a thu an ṭhencat.

Thilumdan cu: Shane hi milian hminthang a si ih Thailand, Hua Hin ah inn anei. Thailand nuthlawi kum 31 mi Laxami thawn an duhaw ih an neiaw, Laxami in fanu pakhat anei cia. Laxami hi hlawhhlang a si. November 1, 2014 zan ah Shane in a nupi cu a hnaṭuannak hmun ihsin a ko ih hotel ah a lutpi hnuah a that.

A taksa cu a candip thluh ih suitcase sungah a ret, cutin Mae Khlong River tiva ah ava hlon. Shane cu Malaysia ah a tlan ih Spain ramah a feh, Spain ram khalah inn ṭha zet a nei. November 6, 2014 zinglam ah tualsung palik pawlin Laxami ih ruak an hmu.

January 28, 2015 ah tualthattu Shane kaihnak warrant an suah ih June 2017 ah Spain palik pawlin Shane cu an kai. Thailand cozah in thilṭulmi pawl a buaipi rero hnu nikum 2021 July thla ah Spain ram ihsin Thailand ram ah an kuatsal.

May 31, 2022 sun ah a thuhla cu court in a relsak, kum 16 sung thawngtla dingin a thu an ṭhencat lawk nan a sualnak pawl a phuangawk thluh ruangah a hrekin an ṭhumsak ih kum 8 sung lawng thawng a tla ding. Zangnadawmnak cu a nupi ih nu hnenah 10.5 million baht a pe dingih a fanu hnenah 2 million baht a pe ding.

Thudang: A Fanu Pahnih Thattu A Ngaidam
Kum 65 mi Mina Smallman cu The Church of England ah puithiam ṭuan zo a si. A fanu pahnih cu misual kum 19 mi Danyal in June 6, 2020 zinglam ah a that. Mina Smallman cu sakhua miṭha zet a si ih a fanu pahnih thattu cu “ka lo ngaidam” a ti.

June 6, 2020 zan ah a fanu Bibaa ih suahcam an lawm, park sungah an lawm. Midang an tlung thluh hnuah Bibaa le a unu Nicole cu an um lai ih an zukaw rero. Cutawk ah mino kum 19 mi Danyal in nam in ava dawt ciamco. Palik pawlin thu an sutnak ah Danyal hi Setan bia a si, thawinak ah nunau a hmang asilen aungbali a poh ngah ding ti a zum ruangah Bibaa tei unau cu a that.

Cumi hnuah palik pahnih in mithi ruak cu an hmu ih selfie in an zukpi, palik pahnih in mithi ruak cu selfie in an zukpi ruangah thiamlo coter an si ih kumhnih le thla 9 sung thawngtla dingin an thu an ṭhencat. Tualthattu Danyal khal kum 35 sung thawngtla dingin a thu an ṭhencat.

Be the first to comment

Leave a Reply

Your email address will not be published.


*