Ukraine Buainak Ah NATO In Ralkap A Thlah Tum Lo, Ukraine Hi NATO Member A Si Lo

The North Atlantic Treaty Organization (NATO) sungah leitlun ram picang zetzet 30 an um ih NATO sungih um lo ram pawl thawn an doawk asilen bawmaw tawn dingin thutiam kamawknak an nei.

Russia in NATO pawlkom hi a do nasa, Ukraine ram hi Russia kutsung ihsin zalennak ngah a si nan Russia in a control tum ringring lai. Ukraine ram in sihimnak hawlin 2008 kum ah NATO member si dingin hmin a peaw nan cohlannak aum hrih lo ih NATO thawn pehtlaihaw (partner) men a si.

George W Bush president arak ṭuan laiah Ukraine hi Membership Action Plan (MAP) ah thunlut dingin a ti nan Germany le France in an duh hrih lo. NATO member si dingin a tling hrih lo an ti, khatlam ah Ukraine hi NATO member asilen Russia thawn an buai a ṭul ding ti an hmucia ruang khalah a si thei.

NATO cu leitlun ralpi a veihnihnak a cem hnu 1949 kum ah members 12 in an rak din thok. Cumi hnuah ram 30 an funkhawm aw ih an bawmaw ringring, awlsamten NATO member ih lut khal a ngah lo.

Russia-Ukraine buainak ah NATO secretary Jens Stoltenberg (kum 62) in, “Russia ih cangvaih cu a ṭha lo tuk, Ukraine ih duhhrilnak ah a hnar rak tawk rero a ṭullo. Mithi tam zet an um zo ih nan mawhphurnak a si. Russia in Ukraine ram cu NATO ih naute ah a ruat. Ukraine ram parah ziangvek ruahnak nan nei asikhallen thahrum thawn a ṭullo” a ti.

Media pawlin NATO ralkap an kuat tum le tum lo thu an sut ih Jens Stoltenberg in, “Ukraine ramsung ah NATO ralkap an um lo, Ukraine ram ah NATO ralkap thlah kan tum lo. Ukraine hi kan ralkap pawl ih partner a si, NATO member a si lo” a ti.

Be the first to comment

Leave a Reply

Your email address will not be published.


*