Ukraine Buainak Lakah Mizo Sister 2 In Rawngbawlnak Neih Vivo An Tum

Ukraine ramsung buainak lakah Mizo Sister 2 an um ih damlo, hngakṭah le farah pawl an kilkhawi. Mother Teresa ih dinmi Missionaries of Charity ihsin rawngbawlnak an nei. An hmin cu Sr Rosela Nuthangi MC le Sr Ann Frida MC an si.

Sr Rosela Nuthangi cu Mizoram, Sihphir Venghlun ih um Pi Monica Lalbuangi le Pu David Laiawrha tei fanu a si ih Mizo lakah MC sister pahnihnak a si, 1984 kum ah rawngbawlnak nei dingin Thutiam hmaisabik a la. Mizo lakih MC sister hmaisabik cu Sr Melodia Mantawni MC a si ih 1983 kum ah thutiam hmaisabik a la.

Sr Ann Frida MC cu Mizoram, Electric Veng ih um Pu Joseph Rothangpuia (L) le Pi Elizabeth Lalremi tei fanu a si ih Mizo lakah Missionaries of Charity sister 14-nak a si ih 1998 kum ah thutiam hmaisabik a la. Kolasib ah rawngbawl ih aum ringring hnuah Ukraine khawpi Kyiv ah rawngbawl dingin a poksuak.

Kum 10 ah veikhat Mizoram ah an tlung ih ni 25 hrawng an cam ṭheu. Missionaries of Charity Sisters pawlin hnipuan pahnih hrawng lawng an nei ih an vah sukso ti khalah suitcase lawng an keng. Tulai leitlun cangkannak Mobile Phone, nazi, TV tivek zianghman an nei lo, an kol lo ih an ṭul fawn lo.

Parliament kawt ah mino pawl thawn thlacamnak an va nei ṭheu, Ukraine ramsung buainak ruangah hmunhimnak lam ih tlan an tum lo ih buainak lakah an kilkhawimi damlo, farah pawl hi an tuamhlawm vivo tum thu an innsang hnenah an sim thei.

Be the first to comment

Leave a Reply

Your email address will not be published.


*