UN Meeting Ah Myanmar Ralkap Rualpi Ṭha Ram Pakhat A Pholang Aw, Amah Lawngin Ralkap Pawl Hrem Lo Dingin Vote A Pe

UN General Assembly an koaw sal ih Myanmar ralkap pawl hrem le hrem lo ding thuhla an rel. Ram 119 in Myanmar ralkap pawl hrem dingin vote an pe, China le Russia ram telin ram 36 in vote an pe lo. Asinan, Belarus ram pakhat lawngin Myanmar ralkap pawl hrem lo dingin vote a pe.

Belarus ram le Myanmar ralkap pawl pehtlaih awknak cu theih arak si tuk lo, asinan UN hmaiah hrem lo dingih vote a pek ihsin an thuhla cu an zingzoi vivo ih pehtlaih awknak ṭha zet an rak nei ti an hmusuak. U Thein Sein vanglai ihsin an rak pehtlaihaw zo.

Myanmar ralkap pawl ih hmanmi ralthuam ṭhenkhat khal Belarus ram ih sersuahmi a si ti an zingzoi suak. Belarus ram cu Russia le Ukraine ramri ih um a si, Belarus ih sersuahmi ralthuam Kvadrat-M surface-to-air missile system lei hmaisabiktu khal Myanmar ram a si.

2008 kum ah sumdawngnak lam ih pehtlaih aw ringring dingin an rak tongaw, cutin ralthuam le ramsung sumdawngnak ah an ṭuantlang. November 2014 ah Senior General Min Aung Hlaing cu Belarus ramah ava tlawng ih an ram president Alexander Lukashenko thawn an tongaw.

Lukashenko in lungawithu arak sim ih rualpi ṭha an si vivo ding thu an reltlang. 2015 kum ah ralbawi U Khin Aung Myint khal Belarus ramah ava tlawng ih an ram president thawn an tongaw, U Khin Aung Myint in “Belarus vek ih rinsantlak rualpi ṭha kan ṭul” a ti.

November 2017 kum ah Naypyitaw khawpi ah Belarus-Myanmar ram rualpi ṭha sinak, 10th Anniversary Meeting an nei. February 2020 ah Lieutenant General Tin Maung Win cu Belarus ramah ava tlawng. Belarus le Myanmar ram ih pehtlaih awknak cu arak hngetkho tuk zo, phatsan aw thei dinhmun ah an um lo.

UN meeting nak khalah Belarus ram pakhat lawngin Myanmar ralkap pawl hrem lo dingin vote a pe, China le Russia cu hrem le hrem lo lam khalah vote an pe lo veve. Himi an meeting hnu zarhkhatnak ah Belarusian Deputy Minister of Foreign Affairs Nikolai Borisevich le Myanmar ram aiawh Dr. Aung Moe Myint cu Minsk khawpi ah an tongaw.

Be the first to comment

Leave a Reply

Your email address will not be published.


*