US Ah Amah Tuamhlawmtu Siibawi A Kap That, Siizung Ah Mi 4 A Kap That

US, New Jersey, Muskogee khua ih um Michael Louis (kum 45) in amah tuamhlawmtu siibawi a kap that, lamzin ih ding pawl khal a kap ciamco ih mi 3 an thi. Cumi hnuah amah le mah a kapaw that. Michael cu a dunglam zangruh surgery an tuah, kum 59 mi siibawi Dr. Preston Phillips in a tuamhlawm.

May 24 ah siizung ihsin a suak nan a dunglam zangruh cu a naa deuhdeuh. Vei tampi a siibawi cu a phone ih a complain zo. Surgery an tuah hnuah a dunglam zangruh cu a naa deuhdeuh sawn’ a ti. June 1, 2022 zinglam ah meithal a lei ih Natalie Medical Building ah ava lut.

Lamzin rak khamtu cu a kap hluahhloh, amah rak tuamhlawmtu siibawi Dr.Phillips cu a kap that. Mithi dang pathum cu siibawi kum 48 mi Stephanie, siizung ih hmin cazin ngantu Amanda le damlo umpitu William Love pawl an si. Palik in, “Dr.Phillips kap that dingin ara, midang pathum cu a fehnak lamzin ih an rak ding ruangah a kap that” a ti.

June 1 zinglam khalah Michael in a dunglam zangruh a nat tuk thu phone ihsin a complain. Tualsung mipi pawlin siibawi Dr.Phillips cu miṭha zet a si, damlo pawl a ngaihsak thei tuk’ an ti. Michael ih sungkhat in, “A dunglam zangruh a natnak cu a rei tuk zo, asinan himi ruangah mi a that ding ti cu kan zum thei lo. Christian innsang kan si, kan innsang ah hivek mizia nei kan um lo. Kan theithiam lo, kan lau tuk” a ti.

Tulai America ramsung ah tualthatnak a thleng rero, May 24, 2022 zinglam khalah mino kum 18 mi in tlawngta 19 le zirhtu 2 a kap that. Amah khal ṭuanvo neitu pawlin an kap that ve. US president Biden in meithal neih theihnak daan hi kham ding, meithal koltu ding pawl cu an sulhnu pawl zingzoi cia thluh ding tin meithal thuhla buaipitu pawl hnenah a dil.

Be the first to comment

Leave a Reply

Your email address will not be published.


*