US, Texas, Midland ih um tlangval kum 21 mi Jose Gomez in Chinmi Pu Bawi Cung le a fale pawl cu nam in a tuahmawh ruangah August 4, 2022 sun ah thiamlo coter in kum 25 sung thawngtla dingin a thu an ṭhencat.
Pu Bawi Cung hi Midland Chin Immanuel Baptist Church sungtel a si ih 2014 kum ah US ram an thleng. Chin State, Thantlang peng Thau khuami a si ih Kalaymyo ah an um.
March 14, 2020 ah a fapa kum 6 mi le kum 2 mi thawn Sam’s Club store ah an va feh ih tualsung tlangval Jose Gomez in tuahmawh dingin a thlun vivo. Jose Gomez in a hmaiah a thong ih nam in a at, a fapa kum 6 mi ih hmai ah a at.
Hitin an buai laiah dawr sungih hnaṭuantu in ava ṭhen ih nam in arak dawt, midang in Jose Gomez cu an kaibet. An kaibet lai khalah Jose Gomez in ‘America ram ihsin suak uh’ tin a aukhum. Court hmai ah Jose Gomez cu a phuang aw, China mi ah arak ruatsual.
Covid-19 thlisia hrang lai a si ih China mi pawl a hua tuk. Covid-19 tuahsuaktu ih a ruat ruangah a tuahmawh thu a phuangaw ih a fapa kum 6 mi hi that a tum ih hnaṭuantu in a ṭhen thu pawl a rel. Jose Gomez cu huatawknak ruangih sualnak tuah thubuai an orhter ih kum 25 sung thawngtla dingin a thu an ṭhencat. Pu Bawi Cung tei fapa khal siizung an um hnuah damten an suak, dawr ih hnaṭuantu khal a dam ṭha zo.
Leave a Reply