US Ah Kawlram Nu Thattu An Kai

July 17, 2021 sunah kum 58 mi Than Htwe le a fapa kum 22 mi Kyaw Zaw Hein cu siikhan piahaw dingin New York, Chinatown ah an va feh. Kyaw Zaw Hein in a fapa neihsun fimthiam zirnak ah tin 2018 kum ah Myanmar ram ihsin US, New York khawpi ah an vai.

Chinatown subway station step an kailai takah an dunglam ihsin misual pakhat in a fapa ih bag a dirhsak ih an tla thutthi. Kyaw Zaw Hein cu a tla hmaisa ih a dungih ding a nu khal a tla ve. Napin an va sawh’aw ngah ih zianghman thei loin an um lawk. Kyaw Zaw Hein in, “Ka thangharh tikah cun ka kiangah ka nu cu thihnai lakah arak it” tin GoFundMe ah a tarlang.

Bellevue Hospital ah an tlanpi hngal ih a nu cu a lu a sawh’aw ngah naa tuk ruangah a thluak a thi, coma in a it ringring ih sibawi pawlin an theitawk in an tuamhlawm. Asinan, ni 11 hnuah, “Minung kan cang nawn lo” tin sibawi pawlin an beidong thu an sim thei ih a thi.

A pasal le a fapa in “Miṭha le mifel zet a si. A fahniang hrangah nunthar beisei in US ramah a vaihpi ih tui dinhmun kan tong cu kan tuarthiam lo” an ti. Than Htwe ih taksa ṭhatnak pawl cu a ṭulhaimi hnenah kan hlu ding tin sibawi hnenah an sim thei. Than Htwe thattu misual cu an kai ngah lohli lo, palik in CCTV ih arak zuk ngah mi zuk/video cu an tlangthan hnuah a thuhla theitu cun palik hnenah in sim thei uh an ti.

Pawlkom lam khalin tualthattu ih thuhla theitu hnenah $10,000 zat pe dingin theihternak an tuah, misual ih cangvaihdan hi thilru tum maw a si, Asian mi hmuhsuam hrimhrim ih cangvai ti cu an zingzoi vivo ding. Than Htwe ih thuhla ruangah #StopAsianHate tin Asian mi pawl hmuhsuam nawn lo dingin duhphorhnak an nei. Palik pawlin tualthattu cu an hawl rero hnuah tu’ahcun an kai ngah zo ih a hmin cu David Robinson (kum 53) a si ih mithat thubuai orhter in thiamlo an coter.

Be the first to comment

Leave a Reply

Your email address will not be published.


*