US Ah Taksa Ṭha Zuamawknak Ah Salai Tawk Za Thang In Laksawng A Ngah

US, Indianapolis khua ih um tlangval kum 24 mi Salai Tawk Za Thang in Open Lightweight le Open Classic Physique Class zuamawknak ah laksawng a ngah.

August 21, 2021 ah Indiana State Championship zuamawknak an nei ih Salai Tawk Za Thang in Indiana State Championships Men’s open lightweight ah pakhatnak ah a ngah, cun Indiana State Classic Physique Class A ah pahnihnak laksawng a ngah.

A suahsemnak cu Chinram, Hakha khuahlun ah a si. A farnu ThaTha Khenglawt in “Himi hi ka upa Tawk Za Thang (pa_pathang) a si. 2017 kum ah Southport High School ah buaih a ngah, ka upa hi sports lek a paih zet, abik in bawlung sit a paih tuk.

Tlawnginn, kawhhran le tualsung zuamawknak khalah arak tel ṭheu. 2018 kum ah Legg-Calve-Perthes timi damlonak ruangah a ke kehlam cu surgery an tuah. Sport mi hrangah cun har a ti zet, asinan a zuam vivonak ruangah a thiamthil thar a hmusuak.

Gym feh a ngaina zet ih a taksa a tuah ṭha ṭheu (body building), taima zetin a zuam vivo ih tuiṭum zuamawknak ah a tel. August 21,2021 ah Indiana State Championship ah Open Lightweight le Open Classic Class A zuamawknak a tel, ahmaisabik a zuamawknak a si. A zuamnak parah ka suang tuk, hmailam caan khalah Pathian in lo umpi vivo hram seh…” tin a tarlang.

Be the first to comment

Leave a Reply

Your email address will not be published.


*