US Biakinn Sungah Meithal Keng A Lut Ih Mi A Kap Ciamco, Pastor In Tokham In Arak Vuak

US, California, The Irvine Taiwanese Presbyterian Church biakinn sungah misual a lut ih meithal in mi a kap ciamco. Mi pakhat a kap that ih mi 5 in hliamhma nasa zet an tuar, meithal cerek a thunsal laiah pastor Billy Chang in tokham in a lu ah a vuak ih a tlu.

Midang in a meithal an laksak ih an kaitang, cutin palik pawl an ko ih misual cu palik kutsung ah an hlan. Zarhpisun May 15, 2022 sun nazi 1:30 hrawngah khawm an tiak, cumi hnuah rawlei khawmnak an nei. Himi biakinn cu Taiwan miphun pawl khawmawknak hmun a si ih kum upa pawl an khawmaw ṭheu.

Pastor Billy Chang hmuahnak ah rawlei khawmnak an nei, Pastor Billy Chang cu himi kawhhran ah kum 20 sung pastor arak ṭuan zo. Kum 2 liamzo ah Taiwan ram ah a tlung ih rawngbawlnak anei, California ah a kirsal ih rawlei khawmnak an neih laiah misual in a lutchilh.

Misual cu palik pawlin an kai, China mi a si ih a hmin cu David Chou (kum 68) a si. Taiwan biakinn sungih mi a kahnak a san cu China le Taiwan ram pahnih karlak buainak ruangah ti a si, ramkhelhnak thuhla ruangah meithal in a kap. Hliamtuar pawl cu kum upa lam an si ih an dinhmun a ṭha lo zet, siizung ah an tuamhlawm rero lai.

Be the first to comment

Leave a Reply

Your email address will not be published.


*