US Ih Um Fala Pakhat In An Khuami Tin Tlangval A Rinsan Tuk Ruangah A Sumpai Zaten A Eisak Thluh

US, Tennessee ih um kum 20 mi Nicole Hutchinson cu China mi a si. A nu in a thihsan hnuah an inn cu $390,000 in an zuar, a pa thawn an inn man cu an ṭhenaw ih Nicole in $280,000 zat ro a co. California khawpi ah um in hringnun thok a tum.

California an vaih hlanah rualpi pawl thawn an vaksuak ih tlangval “Hao” thawn an tongaw. Hao in ‘China mi ka si ve’ a tiih an khua khal arak bangawk ruangah Nicole in a ngaina in a nel cih, an biaaw ringring hnuah an pehtlaih awknak khal a hngetkho deuhdeuh.

Cumi hnuah Hao in a sumpai pawl cu tulai sumtuahnak cryptocurrency ah ret dingin a fial ih a hlawknak thu pawl khal a sim thei. Nicole in sumdawngmi a si lo ruangah a ngam lo lawk nan Hao in a simfiang ṭheu ruangah sumpai malte a ret thok cu arak pung cak tuk ngai ih a lungawi tuk.

A sumpai zaten a ret hnuah a sumpai cu nikhat hnu nikhat an pung, curuangah Nicole in a pa hnenah a sim thei ih a sumpai pawl ret ve dingin a sawm. A pai sumpai khal a retsak ih reilote ah an sumpai cu $1.2 million ah a cang. Lungawi zetin sumpai cu an va suah tum ih an suah thei lo, an sumpai pawl cu a lem arak si thluh.

Hao in an sumpai pawl cu arak laksuah sak thluh hnuah sumpai lem in a bumkual ti an theisuak cu an ningna tuk. Nicole khal a ṭap rero ih a pa in, “Ziangtin hnem ding ti khal ka thei lo. A poi lo, a poi lo. Thinhar aw hlah ka ti. Ka thin cu a har ve zet, zianghman kan nei nawn lo. Ziangkim kan sung thluh zo” a ti. Tu’ahcun inn nei nawn loin motor sungah an um. Mibumtu Hao cu palik pawlin an kai hrih lo ih an hawl rero lai

Be the first to comment

Leave a Reply

Your email address will not be published.


*