US Pacang In A Hnaṭuanpi Pawl A Kap Ciamco Ih 8 An Thi

May 26 sun ah US, California, San Jose pacang kum 57 mi in a hnaṭuanpi pawl a kap ciamco ih minung 8 an thi, hliamtuar khal an tam zet. Hliamtuar pakhat ih dinhmun cu a sia tuk ih a nunnak hrang a thlaphang um.

Ralkap pawl an va thleng lohli ih amah le mah a kap thataw ti a si. An hnaṭuannak kiangte ah palik sakhan aum ih an va thleng lohli thei ruangah mi a kap that tam man lo, ralkap le palik pawl thleng lohli lo sehla cun mi a that tam zet ding ti an zum.

Valley Transportation Authority (VTA) hmun ih hnaṭuan a si ih hnaṭuantu 2,000 lenglo an um, meithal khal pakhat lawng a keng lo ih bomb khal a kengtel. Hitin a hnaṭuanpi pawl a kah laiah an inn khal arak kang, an inn sangka kiangih CCTV an zohsal ih amai urkang mi si an zum.

Innsung ah zohman an um lo ih an innkang ruangah hliamtuar an um lo. Asinan, an inn cu umnak ding a tlak nawn lo, a kangsia thluh. A hmin cu Sam Cassidy a si ih a hnaṭuannak khal a rei ve thlang. May 26 zinglam khalah hna a ṭuan lai ih a hnaṭuanpi pawl parah thinhneg in a hrang ciamco an ti.

A nupi hlun Cecilia Nelms in “Sam Cassidy in mizia pahnih anei, a mood a fuh caan ahcun miṭha tuk a si. Asinan, a thinheng caan ahcun a aa thluh, inn ara thleng tinten a hnaṭuanpi le an pu parih a thinheng thu a rel ringring.

“Midang cu hnaṭuan awlte an ṭuan, kei cu hnaṭuan har ka ṭuan tin a phunciar ih keimah par tiang ah a thinheng. A hnaṭuanpi pawl that a cak thu khal a rel ṭheu nan a tuah ngam ngaingai ding ti ka rak zum dah lo, tutiang a tuah hrih lo. Tui thil a thleng hlan tiang..” tin tualsung thuthang hnenah a sim. An nupa an ṭhenawknak a rei zo.

Ṭuanvo neitu pawlin Sam Cassidy in a hnaṭuanpi pawl a thatnak san ngaingai thei dingin an zingzoi rero lai ih an inn urkangtu khal an zingzoi lai.

President Joe Biden khalin khuahar innsang pawl hnenah tuarpinak a langter ih “Innsang 8 cu sungkimten an um thei nawn lo. An fate, an nulepa, an nupi le pasal pawlin an tlung ding caan an hngak nawn lo ding, hngah ding an nei nawn lo. An u le nau, hnaṭuanpi pawl cu riahsia in an ṭap rero…” tin a tarlang.

Be the first to comment

Leave a Reply

Your email address will not be published.


*