US Ramah Myanmar Nu That A Tong, A Innsang Pawlin A Taksa An Hlu Tum

Covid-19 a suah hnu ihsin US ramsung ah Asian mi an hmuhsuamdan hi a luar deuhdeuh. July 17, 2021 sunah kum 58 mi Than Htwe le a fapa kum 22 mi Kyaw Zaw Hein cu siikhan piahaw dingin New York, Chinatown ah an feh.

Kyaw Zaw Hein in a fapa neihsun fimthiam zirnak ah tin 2018 kum ah Myanmar ram ihsin US, New York khawpi ah an vai. Chinatown subway station step an kailai ah an dunglam ihsin misual pakhat in a fapa ih bag a dirhsak ih an tla thutthi.

Kyaw Zaw Hein cu a tla hmaisa ih a dungih ding a nu khal a tla ve. Napin an va sawh’aw ngah ih zianghman thei loin an um, Kyaw Zaw Hein in “Ka thangharh tikah cun ka kiangah ka nu cu thihnai thawn a it” tin GoFundMe ah a tarlang.

Bellevue Hospital ah an tlanpi hngal ih a nu cu a lu a sawh’aw ngah na tuk ruangah a thluak a thi, coma in a it ringring ih sibawi pawlin an theitawk in an tuamhlawm. Asinan, ni 11 hnuah “Minung kan cang nawn lo” tin sibawi pawlin an beidong thu an sim.

A pasal le a fapa in “Miṭha le mifel zet a si. A fahniang hrangah nunthar beisei in US ramah a vaihpi ih tui dinhmun kan tong cu kan tuarthiam lo” an ti. Than Htwe ih taksa ṭhatnak pawl cu a ṭulhaimi hnenah kan hlu ding tin sibawi hnenah an sim thei.

Than Htwe thattu misual cu an kai ngah hrih lo, palik in CCTV ih arak zuk ngah mi pawl an tlangthan ih a thuhla theitu cun palik hnenah in sim thei lohli uh an ti.

Pawlkom lam khalin tualthattu ih thuhla theitu hnenah $10,000 zat an pe tum, misual ih cangvaihdan hi thilru tum maw a si, Asian mi hmuhsuam hrimhrim ih cangvai ti cu an theifiang hrih lo. Than Htwe ih thuhla ruangah #StopAsianHate tin Asian mi pawl hmuhsuam nawn lo dingin duhphorhnak an nei rero lai.

Be the first to comment

Leave a Reply

Your email address will not be published.


*