July 30, 2022 zanṭim nazi 12:30AM (Myanmar caan) ah America rampum huap taksa ṭha zuamawknak (NPC U.S.A Bodybuilding Championship) an nei ding. Cutawk ah Kachin tlangval kum 24 mi Ko Swat Gren a telve ding.
Ko Swat Gren hi Kachin State, Myitkyina khuami a si ih 2018 kum ihsin taksa ṭha zuamawknak ah a tel zo. NPC U.S.A Bodybuilding Championship zuakawknak ih teltu ding pawl cu America ramkulh 50 ih palai pawl an si, an ramkulh sungih taksa ṭha zuamawknak ah pakhatnak ngahtu ciar an si.
Ko Swat Gren khal Texas ramkulh aiawh in a tel ding. Nikum November 14, 2022 ah Texas State sungah taksa ṭha zuamawknak an rak nei ih Ko Swat Gren in Mr.Texas 2021 laksawng a ngah. Zuamawknak ih an tel hlanah zarh 21 sung training an nei, zuamawknak hrangah ei le in khal an hril ih harsatnak phunphun a paltlang thu a rel.
Kachin tlangval in, “Professional si thei dingin himi zuamawknak ah ka tel. Ka tumtahmi cu International Federation of Bodybuilding and Fitness (IFBB Pro) ah nehnak ka co asilen thiam hliece (Professional) pakhat ka si thei ding. Kawlram mi in an ngah hrih lo, ka tumtahmi cu Kawlram mi lak ihsin pakhatnak ngahtu si ka zuam” a ti.
Thudang: A Fala Hlun A That Ruangah Cozah In A That, A Thah Mi Innsang Pawlin Ngaithiam An Dilsak Nan An Cohlang Lo: US, Alabama ramkulh, Atmore khua ih um kum 50 mi James in a fala hlun a that ruangah court in thiamlo a coter ih July 28, 2022 zan nazi 9:00 ah thihsii in an dawt that. A thatmi innsang pawlin ngaithiam an dilsak nan court in a cohlang lo.
A that hlanah a netabik a rawlei duhmi an sut ih zianghman a duh lo. 1994 kum ah fa pahnih nei zo a fala hlun Faith (kum 26) cu meithal in veithum a kap ih a thi. Faith in a ṭhen ruangah a thinheng tuk ih an ṭhenawk hnuah ava tibuai ṭheu, cutin innsung ah a lutcilh ih a kap that. Himi lai caan ah Faith ih fanu cu kum 3 mi a si ih a fapa cu kum 6 mi a si. Tualthattu James cu palik pawlin an kai ih kum 28 hnuah thihsii in an dawt that. Thi dingin a thu an ṭhencat cu Faith ih innsang pawlin an cohlang lo.
Faith ih fanu in, “Thihdaan aiin damsung thawngthlak si dingin kan duh sawn. An that ruangah ka nu hi ara kirsal cuang lo ding. Ka nu hi miṭha le mi duhdawt thiam zet a si. Tuisun ah hitawk hmun ah ka nu hi um ve sehla cun a ngaithiam ding” a ti. Faith ih fapa in, “Thilsual zet a tuah, a tuar hi a tawk tuk zo. A thih ruangah kan hringnun a nuam phah cuang lo ding” a ti.
Leave a Reply