US Rapper Cu Online Ih Live A Thlah Laiah A Lu Ah An Kap That

Kum 21 mi Zerail Dijon Rivera cu tulai California rapper pakhat a si, July 8 sunah online milar Kapone thawn Instagram parah live thlah in an bia’aw. Milar veve an si ruangah zohtu khal an nei tam zet.

Zerail Dijon Rivera ih hmindang cu Indian Red Boy a si. Zerail cu California, Hawthorne lamzin kap ah dingin a motor sungah aum, cutin online parih an biakawk rero laiah zo ti theih loin naitakten a lu ah veithum an kap ih a thi.

A thih hlan khalah “In bawm uh” tin a au, online mipi pawlin an rak hmu thluh ih an riahsiatnak thu pawl an tarlang. Ṭhenkhat in “A video hmaisa lamah cun a hnihsuak um tuk, a hlimum tuk. Asinan, cumi hnu reilote ahcun thaw khal ka thaw thei nawn lo” an ti.

Ṭhenkhat in “An live thlah mi video ka rak zoh ngah cu ka siraw tuk, ka mitthlam ah a cuang ringring lai” titu khal an um. An video cu online par ihsin an hlonhlo zo, palik pawl an va thleng tikah cun arak thi zo ti a si.

A kap thattu hi zo an si ti an thei hrih lo, amah that tumcia ih kap an si ding ti an zum. Mi ṭhenkhat zumdan ahcun, mithi zo rapper Nipsey Hussle a relsiat ruangah a si ding ti an zum. Nipsey Hussle cu 2019 kum ah zo ti theih loin an kap that, a kap thattu hi tuini tiang an zingzoi suak thei hrih lo. (#The Sun)

Be the first to comment

Leave a Reply

Your email address will not be published.


*