US Thuthang Latu Airport Ah An Kai

May 24 ah Myanmar ralkap pawlin US journalist Danny Fenster an kai. Yangon airport ihsin Malaysia khawpi Kuala Lumpur ih zamsuak tum a si ih a zamsuak hlante ah an va kai. Ziangruangah an kai ti cu theih a si hrih lo, cun tutiang aumnak khal a hnaṭuanpi pawlin an thei hrih lo.

Danny Fenster in Myanmar ramsung ih thilthleng pawl a la ṭheu ih leitlun mipi pawl hmuh ah arak pholang rero zo. Frontier Myanmar thuthang khalah editor ṭuan lai a si.

Frontier Myanmar ṭuanvo neitu in “Khuitawk ah an ret ti kan thei hrih lo ih kan seherh zet, Insein thawnginn ah an ret ko ding. Insein thawnginn cu ramkhel an kaihmi pawl an khumnak hmunpi a si, kan seherh zet ih a suah lohli theinak dingah kan ausuak ding. A ṭulsammi le a himnak cu kan ṭuanvo a si” a ti.

Myanmar ralkap pawlin Poland thuthang latu Robert Bociaga le Japan thuthang latu Yuki Kitazumi khal an arak kai zo. Asinan, an pahnih in an suahsal zo. Myanmar ralkap pawlin thuneihnak an lak hnu ihsin media pawl hi an do zet, an ral tumpi pakhat ah an ruat ih ramsung thuthang cazual khal suah an siang nawn lo.

Media pawl cu online sung lawngah an cangvai thei, ramsung thuthang latu 85 hrawng an kai zo ih ṭhenkhat cu an suahsal. Kai dingih warrant an suahmi media khal 22 an um lai, ramsung media 8 ih licenses cu an hlonhlo sak.

The Irrawaddy thuthang khal 505 hmangin taza an cuai lai. Voice of Myanmar (VOM) ih Editor-in-chief U Nay Myo Linn le an reporter Ko Shine Aung khal tlawngkai nikhat sun ah an kai. Media an kaihmi pawl cu thiam lo coter asilen kum 3 sung thawng an tla ding.

Be the first to comment

Leave a Reply

Your email address will not be published.


*