US Tlawnginn Ah Kahawknak A Thlengsal Ih Mi Pakhat A Thi

US, New Orleans tlawnginn ah Morris Jeff High School upa pawl cu tlawng ṭheh buaih pekawknak an nei. Xavier University tualrawn ah buaih pekawknak an nei. May 31, 2022 ah tlawngta le nulepa pawl cu an tongaw khawm.

Buaih an pek thluh hnuah an zukaw cece ih cutawk ah nunau pahnih cu ṭongkam an el’aw ciamco ih sualawknak a thleng. Cumi hnuah meithal kahnak a thleng ih an tlan ciamco. Pitar pakhat an kap that ih mipa pahnih in hliamhma an tuar, hliamhma tuar cu seherh um dinhmun an si lo.

Pakhat cu a awm ah an kap ngah ih pakhat cu a ke ah an kap ngah. Tlawngta pakhat in, “Mithi cu ka rualpa ih pi a si. Lamzin ih um uico vekin an kap that” a ti. Palik pawlin minung pathum an hrentang ih thu an sut rero lai, kaihmi cu an nei hrih lo.

Ṭongkam el’awtu in meithal an kap maw, an kiangkap ih um pawlin an kap ti cu an theifiang hrih lo ih an zingzoi rero lai.

Ṭuanvo neitu in, “Minung pathum cu thu kan sut rero lai. Texas nauhak tlawnginn ah kahawknak a thleng zo, cumi hnu ni 12-nak ah Louisiana tlawnginn ah minung pathum an kap. Kumkhat sungih an hnaṭuan hlawhtling lawmnak ni cu meithal in a siatsuah” a ti.

Be the first to comment

Leave a Reply

Your email address will not be published.


*