May 24, 2022 zinglam nazi 11:32AM ah mino kum 18 mi Salvador cu Texas, Robb Elementary School ah ava lut ih tlawngta pawl a kap ciamco. Meithal pahnih a keng, tlawngta 18 le zirhtu pakhat an thi.
A tir ahcun mithi 14 tin an tarlang nan neta ah meithal kahnak hliamhma tuar lo ih thi an um. Tlawngta tam zet cu hliamhma nazet tuar in siizung ah an tuamhlawm rero lai. Salvador cu palik pawlin an kap that. Salvador in a suahcam kum 18 birthday meithal a lei, daan vekin meithal a lei ih online parah a tarlang.
Tlawngta pawl a kah hlanah a pi a kap hmaisa, a pi cu siizung ah an tuamhlawm rero lai. Lamzin ah palik pawl thawn an kapaw ih palik pakhat in hliamhma a tuar, cumi hnuah tlawnginn sungah ava lut ih tlawngta pawl a kap ciamco. Lamzin ih a kahmi palik pawlin tlawnginn tiang an dum.
Himi tlawnginn ah tlawngta 600 hrawng an um. Tlawnginn ṭuanvo neitu in tuikum sung cu tlawnginn kan khar ding, kumcem buaih pek ding khal a langten kan cawl lawk ding a ti.
May 14, 2022 khalah mirang tlangval kum 18 mi in New York, Buffalo dawr tumpi sungah mi a kap ciamco. A thaisun May 15 ah California, Laguna Woods biakinn sungah meithal keng mi pakhat a lut ih biakinn sungih um pawl cu a kap ciamco. Mi pakhat a kap that ih mi 5 in hliam an tuar.
US ram hruaitu pawl khal an beidong zet, mipi pawlin meithal thuhla ah daanthar tuah dingin an ngen. Tlawnta nauhak pakhat ih pa in, “Tu’ah nulepa tam zet cu an ṭap rero lai. Texas rampi cu lungsia in aum” a ti.
Leave a Reply