Veng Lal An Kap Ih Cerek Mu A Suak Thei Lo Ruangah Nam In An Dawt Hnuah Veng Lal Ihsin Suahnak Ca A Thehlut

Sagaing peng, Monywa ramsung ih Ahlone Sitpin veng lal cu zo ti theih loin meithal in an kap ih cerek mu a suak thei lo ruangah nam in an dawt. A vanṭha ah a thi lo ih veng lal sinak ihsin a suak cih.

September 20 sun ah veng lal U Myint Soe cu an hmuanchar ih kuangkuah hmuan ah aum, kuangkuah hnah a la rero. Culaiah zo ti theih lo mi 2 cu bike in an phuraw ih a dunglam ih totu in meithal in a kap nan cerek mu a suak thei lo, curuangah an va tlan ih nam in an dawt.

U Myint Soe cu nam ih dawtnak hliamhma a tuar ih cozah siizungpi ah an tuamhlawm, siizung ih an tuamhlawm rero lai September 21 sun ah veng lal ihsin suahnak ca a thehlut.

A cangan mi ahcun, “Ahlone Sitpin veng lal, kei U Myint Soe in veng lal ṭuanvo ka ṭuan paih nawn lo ruangah veng lal sinak ihsin in suahter uh/suahnak ca ka lo hlan” tin tlun lamah a kuat. Ahlone Sitpin veng cu ralkap sakhan thawn naiaw te a si nan ralkap pawlin zohman an humhim thei lo tin hmin tarlang rem ti lo pakhat in a rel.

Be the first to comment

Leave a Reply

Your email address will not be published.


*