Vietnam Inn Pakhat Ah Naute Ruang 1,000 An Hmu: Rapthlak!!!

Vietnam, Ha Dong district, Hanoi vengsung ah thildik lo aum ding tin an rinhlel ruangah ṭuanvo neitu pawlin zingzoinak an va nei. An hmuh dahlo mi pawlin bag dum an khai ih an vengsung apartment sungah an lutpi ṭheu.

May 29 ah palik pawlin an va lutchilh ih an innsung ah freezers tumpi pahnih an rak um, cun minung 4 khal an kai. Freezers tumpi sung an zoh cu naute ruang 1,000 arak um, naute pawl cu pum sung um lai ding thlakim hrih lo an si.

Thu an sutnak ah an kaihmi 4 pawl cu mi tlawmngai pawlkom an si ih siizung ih nauthlak mi le lamzinkap, hnawmbawm sungih naute hlonmi pawl an rak samkhawm ṭheu ih Hanoi’s Thanh Oai, Soc Son districts le Nam Dinh Province ah vuinak caanserh nei ding an si thu an sim thei.

Tulai boruak a siat ruangah le an umnak a hlatawk deuh ruangah naute ruang pawl cu hmunkhat ah an ret sung tin an sim. Palik pawl khalin an zingzoidan ah sualnak an nei lo ding ti an zum, asinan naute ruang 1,000 rori an rak ret ṭhakhawm ruangah vengsung mipi pawlin thildik lo aum ding ti an rinhlel lai.

Naute ruang pawl cu an vuiliam zo ih zingzoinak an nei vivo lai ding. Vietnam ram hi leitlun ih nauthlak tambik ram ah a telve, 2018 kum ah an ramsung harhdamnak zung Ministry of Health in naute 100 ah 14 cu nauthlak mi an si tin an ngankhum.

Hitin nauthlak an tamnak san cu nauhak tete ih nupa-sinak an rak hmang ṭheu ruangah le nupi-sinak thuhla fimthiam zirnak an neih lo ruangah a si an ti. Cun, pasal nei lo ih naupai cu an hmuhsuam thei tuk ruangah pasal nei loin naupai an ngam lo ih an thlak ṭheu.

Be the first to comment

Leave a Reply

Your email address will not be published.


*