Vokte Phur Pacang Cu Ralhrang Pawlin Meithal In Vei Tampi An Kap Ciamco Ih A Thi

Kachin State, Mohnyin Township, Mawhan khawluh hlan check-gate ah ralhrang pawlin vokte phur pacang cu meithal in vei tampi an kap ciamco ih a thih thu theih a si. Kum 31 mi U Thein Zaw Win cu voksa zuar ih eihawl a si.

November 28 ah hmun dang ta vok ava lei. Zan nazi 8:00 hrawngah an tlung ih check-gate ah ralhrang pawlin an rak dingter, asinan a motor break a siat ruangah a ding lohli thei lo. Ralhrang sakhan lan hnuah an dingih an motor break a siat thu cu simfiang a tum laiah kiangkap ih duty ralhrang pawlin an kap ciamco hngal.

A lu khal an kapparh, a taksa khal a siat thluh. Amah bawmtu motor sungih um kum 25 mi Ko Aung Myo San ih kut le kawng ah an kap ngah ve. Tualsung mi pakhat in, “Vok an va lei ih an tlunlam Mawhan check-gate kiangah an kap that, tlangpar ihsin an ṭum zawngah an motor break a siat ih an ding lohli thei lo.

Ralhrang sakhan hi malte lawng an lan, an motor break siat thuhla simfiang dingin motor sung ihsin a suak cu an rak kap ciamco hngal. A lu khal an kap pawp, a taksa zaten a siat thluh ruangah a ruak hi ret rei a cin lo ih kan phum hngal” a ti.

U Thein Zaw Win in a nupi le a fanu kum 5 mi a thihsan, U Thein Zaw Win hi voksa zuar in pumcawm a si ih himi ralhrang check-gate hi arak paltlang ṭheu nan tuiṭum ahcun siatnak rapthlak zet a tong. Himi thil a thleng hlan a mizan ah himi kiangkap ah tualsung mipi kilhimtu le KIA pawlin ralhrang bomb an puah ih amal bik ralhrang 8 an thi.

Be the first to comment

Leave a Reply

Your email address will not be published.


*