Yangon Ah Mithi An Tam Deuhdeuh, Nikhat Ah Mithi 1000 Hrawng An Um

July 19, 2021: Myanmar ramsung ah Covid-19 thlisia a veithumnak a hrang ciacmco ih Yangon ramsung in an tuar nasa zet. Tui dinhmun ahcun nikhat ah mithi 1000 hrawng an um ringring thlang ruangah mithi ruak thiartu pawl khal an daihaw nawn lo.

Mithi ruak urtu pawl khal sun le zan rori ih an urkang a ṭul ruangah an buai zet. Ṭhenkhat in mithi ruak pawl cu anmai motor, vengsung motor tivek hmangin an thiarsuak thlang. Mibawmtu pawlkom khal an hngak thei nawn lo.

Mibawmtu pawlkom pakhat in “Mithi ruak pawl cu mithi urkannak ah kan va ret, asinan mithi an tam tuk ruangah kan suaksal thei nawn lo. Dunglam ah mithi ruak phurtu motor tam zet an rak tlaraw man, an caan a thleng hlan ahcun an tlan thei lo ruangah kan rak hngak ve ringring a ṭul.

Ruak pakhat kan thiar tikah nazi 3 hrawng cu kan va um ta a ṭul ringring. Curuangah veikhat phur ah ruak 2/3 kan phur ṭheu, mithi ruak la dingih in rak phone-tu pawl khal kan el” a ti.

Vengkhat sungah mithi 3 tla an um ruangah vengsung motor hmangin an thiarsuak ṭheu. “Mithi an tam deuhdeuh ih duh vekin kan bawm thei nawn lo a si bik. Yangon ah mithi urnak hmun 3 aum ih nikhat ah mithi 1000 hrawng cu an um ding. Mithi an tam deuhdeuh ti cu mithmuh theih a si zo” tin South Dagon Funeral Home ṭuanvo neitu in a rel.

Be the first to comment

Leave a Reply

Your email address will not be published.


*