Yangon Ah Ralhrang Pawlin ‘Dark Shadow’ Mi 14 An Kai Ih Pakhat An Kap That

Yangon ah ralhrang pawlin mipi ralkap mi 14 an kai ih pakhat cu tlansuah a tum ruangah an kap that thu an phuang. A hlan ih an kaihmi mino pakhat cu lamzin khihhmuhtu dingah an hruai ih April 27 zinglam ah ‘Dark Shadow’ pawl cu an umnak inn ah an va kai thluh.

Thuhla theitu in, “Ralhrang pawlin an kaihcia mi mino pakhat cu an umnak khihhmuhtu dingah an hruai, lamzin khihhmuhtu cu an kai hmaisa ih pukmah 505 in thubuai an orhter. ‘Dark Shadow’ pawl ih umhmun khuarnak a theicia ih ralhrang pawl cu lamzin a khihhmuh. Pakhat cu an kap that ih mi 13 lawng an kai, an pawlkom zaten an kai vek a si” a ti.

April 28 zan ah Yangon khuasung ah ‘Dark Shadow’ le ralhrang pawl an kapaw ih mithi le hliamtuar an um ding tin vengsung mipi pawlin media hnenah an sim. April 25 zan khalah ‘Dark Shadow‘ pawlin ralbawi pawl umnak inn kiltu ralhrang cu bomb in an va puah hnuah an kap.

Yangon ramsung ah ‘Dark Shadow’ pawl an cangvai nasa zet ih ralhrang pawlin kai dingin an hawl rero. April 21 zan ah ‘Dark Shadow’ pawlin Kamaryut ih palik sakhan cu bomb in an puah, ralhrang pawlin meithal an kap ciamco ruangah kiangkap ih um vengsung mi pahnih an thi.