Yangon Airport Kiangah Bomb A Puak Ih Kiangkap Um Pacang Pakhat An Hrem That, PDF A Si Lo

December 21, 2021 zinglam nazi 7:00 hrawngah Yangon International Airport kiangah bomb a puak ih kiangkap ih um pacang Maung Aung Thu cu ralhrang pawlin an kap ciamco hngal ih a kawng ah an kap ngah, cutin an kai ih thu an sut phahin an hrem that.

An sungkhat in, “Maung Aung Thu hi harhdamnak áš­ha lo a si, a hna a set. Khual ka tlawng ding tin bag thawn inn ihsin a poksuak, a nupi khal a nu tei inn ah ava riak. Ralhrang pawlin a kawng ah an kap ngah ih thusutnak hmun ah an that.

Cumi hnuah ralhrang pawl cu an inn ah an va feh ih an thilri bungrua pawl an zoh thluh nan zianghman an hmu lo, PDF khal a si lo ih daiten um men mi a si” a ti. Tuisun December 22 sun nazi 3:00 ah a ruak cu ralhrang pawlin an phum tum ih an sungkhat minung 5 lawng a ruak phumnak ah tel dingin ralhrang pawlin an ko, asinan a ruak cu zoh an siang lo.

Tualsung mi pakhat in, “Ralhrang pawlin zingzoinak, thusutnak khal nei loin an kap that. Bomb puahtu a si le si lo khal an zingzoi lo. Bomb puahnak aum asilen kiangkap ih um cu an kap that hngal vek a si, bomb puahnak kiangkap ih um pawl cu an that hngal. Daan le dun khal aum nawn lo” a ti. Yangon Airport kiangih bomb a puak ruangah Airport cu an khar lawk.

Be the first to comment

Leave a Reply

Your email address will not be published.


*