Yangon Ihsin A Suahsemnak Falam Ah Damlo Pawl Tuamhlawm Dingin A Tlung Hnuah Covid-19 Kai In A Thi

Laimi lakah siibawi thiamsang kan rinsanmi, minote si lai, hmailam caan khuaeng zet neitu in mual in liamsan cu a poi tuk. Dr. Van Lal Za Thang cu 1988 kum ah a piang, a nulepa cu Nu Fung Nei Le Pa Khuang Hlei Thang tei fapa a si ih unau 6 lakah 4-nak an fapa neihsun a si.

2005 kum ah Mandalay Medical University ah tlawng a kai ih Chin mino cangvaihnak phunphun ah a tel ṭheu. 2012 kum ah buaih a ngah ih Chin mipi tlanlennak Kalaymyo, Tahan, Wesley siizung ah hna a ṭuan.

Cumi hnuah Falam khua le a kiangkap khua ah damlo pawl a tuamhlawm. 2018 kum ah Yangon General Hospital ah an thawnsal, 2021 kum ramsung buainak ah CDM tuah sibawi a si.

June 2021 thla thok lamah Chinram le Kalaymyo cu Covid-19 natsia in a nuai ciamco ih mithi khal an tam zet, curuangah a mipi damlo pawl tuamhlawm dingin Yangon ihsin a poksuak. Falam khawpi ah damlo pawl a tuamhlawm ih zarhkhat/hnih hnuah raltlan pawl umnak ah a feh.

Cutin, khua te lamah Covid-19 ih damlo pawl a tuamhlawm vivo. Humhim awknak PPE kor khal hruh thiam loin Covid-19 damlo pawl a tuamhlawm ih nathrik a kai. Falam siizung ah an tuamhlawm rero nan ṭhanak lam a pan thei lo ih August 2 zanlam nazi 5:00 ah mual in liamsan.

Siizung ih an tuamhlawm laiah amah khal sibawi a si vekin a awm na cu X-ray tuah a ṭul tuk ti a thei nan Falam siizung ah Covid-19 damlo hrang X-ray tuahnak aum lo.

Cutin, X-ray khal tuah loin mual in a liam, a thih hnuah a hmin in fund hawlnak an nei ih an ngahmi sumsaw in Falam siizung ah X-ray machine, Personal Protective Equipments (PPE) le siivai pawl an hlu ding. (Dr. Vanlal Za Thang Foundation hmet-aw)

Be the first to comment

Leave a Reply

Your email address will not be published.


*