Yangon Inndot Par Ihsin Dawp Ih Mual Liamtu Unau 2 Hi An Zangfak Um Tuk

August 10, 2021 sun ah ralkap pawlin Yangon, Botahtaung Township, 44 lamzin kap ih um inndot number 38-nak cu an va sim ih a sungih um mino 5 cu ralkap kut sungih um aicun tin inndot par ihsin an dawp ih an thi.

Cumi lakah innsang nu, fa pakhat nei khal a telve. Mithi lakah suakpi unau 2 khal an tel, an hmin cu Ko Wai Zaw Htet le Ko Wai Yan Htet an si. Sagaing ih um an si ih nulepa an nei nawn lo, Yangon ah an unau 2 in an khuasa ih hna an ṭuan ṭheu.

Sungkhat pehtlaihtu khal an nei lo, an thih hnuah an ruak hlamtu le an urkangnak khalah umpitu an nei ve lo. Hlamtu neilo mithi ruak tin an ngankhum ih an rualpi pawl lawngin an buaipi.

Upa sawn Ko Wai Zaw Htet cu network engineer a si ih a nau Ko Wai Yan Htet cu Designer a si. A nau Ko Wai Yan Htet hi lamzawhnak ah arak tel ṭheu nan thildang cangvaihnak ahcun a tel lo.

August 10 sun ah a u ih hnaṭuan ava bawm ih cutin an unau 2 in inndot par ihsin an dawp. A hmun ah a u sawn cu a thi hngal, Ko Wai Yan Htet khal hliam nazet a tuar ih ralkap pawlin an thiar hnu a thaizing August 11 zinglam ah a hnuk a catfel.

An rualpa in “Unau diktak an si, a nau sawn ih ruak cu a hnaṭuanpi pawlin an va zoh. An urkang tik khalah umpitu an nei lo, mi theih lo ih an hloral mai ding cu kan siang lo ruangah an thih hnu ni 7-nak ah an hrangah thilṭha/a hlu kan tuahsak ding” a ti.

Be the first to comment

Leave a Reply

Your email address will not be published.


*