Yin Sein Hospital Ih Sibawi/Nurse Pawl Cu Hnaṭuan Loin Duhphorhnak An Langter, An Thlahlawh Ah An Lungawi Lo

Kachin State, Myitkyina khawpi ih um Yin Sein Hospital ih hnaṭuantu pawl lakah buainak a suak. Himi siizung ah hnaṭuantu sibawi/nurse 50 an um, an pule pawlin an hnaṭuan caan an ti tam ruangah thlahlawh khal pungter dingin an ngen ih an duh lo ruangah siizung ah feh loin duhphorhnak an langter.

Duhphorhnak tuah nurse pakhat in, “Hna kan ṭuan pekte ah kan pule pawlin thlakhat sungah nazi 240 sung hnaṭuan dingin in tiih kan lungkim. February 14 ihsin thlakhat sungah nazi 300 sung hnaṭuan dingin an ti.

Thlakhat sungah nazi 60 in hnaṭuan caan an ti tam thlang, curuangah thlahlawh khal pungter dingin kan dil ih an duh lo ruangah duhphorhnak kan tuah” a ti. Thlakhat ah nures sinak sang pawlin ting 5 an hlawh ih nurse pangai pawlin ting 4 an hlawh.

A hlan ah hnaṭuantu 50 an um ih an pule pawlin ‘kan tlasia ruangah minung 40 hrang lawng thlahlawh kan lo pe ding’ an ti. Mai hnaṭuanpi banawk cu an duh lo ruangah thlahlawh lak caan hi anmahten an thlengaw ih semrem aw dingin an tawlrel, an pule hnen ihsin minung 40 hrang lawng thlahlawh an la ṭheu ih hnaṭuantu cu 50 an um.

Tu’ah an pule pawlin minung 30 hrang lawng thlahlawh kan lo pe thei ding’ an ti lala cu an lungawi lo zet. An pule pawlin nan duh asilen suak uh, hnaṭuan duhtu pawl thawn kan ṭuantlang ding an ti.

Hitin an buai hnuah Yin Sein Hospital Facebook cahmai ah nurse 25 an duh thu an tarlang lawk nan a rei hlanah an hlonhlo sal. Media pawlin thilumdan theifiang dingin Yin Sein Hospital ṭuanvo neitu an be ih “Duhphorhnak tuahtu nurse pawl thawn kan beaw rero, thuhla a cipciar cun kan lo sim thei hrih lo” an rak ti.

Be the first to comment

Leave a Reply

Your email address will not be published.


*