Zan A Mang Ah Hringtu A Pa A Hmu Ih Nunau 42 A That

Indonesia ram ih mithat hmang Ahmad cu July 10, 2008 kum ah an kap that. Kan dung July 10, 2022 kha a thihcam kum 14 kimnak a si ih a thuhla an pholang sal. Ahmad hi a thih tikah kum 59 mi a si. Nunau 42 a that ih nunau ṭhenkhat cu kum 11 mi an si.

A tir ahcun ranvulh ih eihawl a si, cumi hnuah tualsung puithiam/dawithiam a si. Damlonak pawl a tuamhlawm dam thei ih a hminthang zet. Zan a mang ah a pa thi zo a hmu ih a pa in ‘nunau 70 ih cil na in asilen mi tidam thei ropi zet ah na cang ding’ a ti.

1986-1997 kum sungah nunau 42 a that, Ahmad cu mi tidam thei tin a hminthang zet ih hmun dangdang ih um nunau pawlin an va pan ṭheu. Nupi khal pathum a nei. Ahmad in, “Ka mang ah ka pa ka hmu ih ka pa in nunau 70 ih cil na in asilen mi ropi zet ah na cang ding in rak ti.

Nunau pawl that aw ti cu in fial lo. Nunau that lo ih an cil in ding cu caan reipi sung ka hngak a ṭul ding ruangah keimahten ruahmannak ka nei ih nunau 42 ka that man” a ti. Hmun dangdang ih um nunau pawlin Ahmad cu an va pan ṭheu, sumdawngnak ih thangso an duh ruang khalah an pan.

Ahmad in an hmuanchar ih fu hmuan sungah a hruailut ih lei an lai hnuah an awm tang a phum. Himi cu thawinak ciikhat a si a ti, cutin a phum hnuah an hngawng ah a rek ih an kaa ihsin ra suak an cil cu arak in. Cutin, nunau 42 a that ih an hmuanchar fu hmuan sungah a phum.

A phum tik khalah an lu lam cu an inn lam hoizawn in a ret, hitin mithi ruak pawl a ret asilen humham a ngah tam dingah a ruat aw. An theihsuah dan cu April 1997 ah fala kum 21 mi Sri Kemala a hlo ih an hawl ciamco.

Rickshaw mawng mino in Ahmad tei inn ah ava thlah thu a rel, palik pawlin Ahmad tei inn ah zingzoinak an va tuah ih Sri Kemala ih handbag, kawr le suithi pawl an hmu. An inn kiangkap ah an hawl ih mithi ruak 42 an hmu cu an mangbang tuk, palik pawlin an kai ih a tualthat thu pawl a phuang aw.

A nupi pakhat khal a hnaṭuannak ih a telve ruangah palik pawlin an kai ih thihdaan an orhter nan an thumsak sal, damsung thawngtla dingin a thu an ṭhencat. Ahmad cu a sual tuahmi ruangah July 10, 2008 ah an kap that.