Zan An It Laiah A Nupi A Ṭongaa Ih A Thilsual Tuahmi A Relsuak, A Pasal In Palik Hnenah A Sim Thei

England, Lancashire, Fleetwood khua ih um innsang nu pakhat cu zan a itthat laiah a ṭongaa ih a sumpai ruk thu a relsuak ruangah a kiang ih it a pasal in palik hnenah a report. Kum 47 mi Ruth Fort cu pitar putar kilkhawinak runinn ah hna a ṭuan, mahten feh thei lo pitar pakhat a kilkhawi ih bazar a kaipi ṭheu.

Pitar ih debit card cu a hmansak ih a bank account sungah sumpai tampi aum ti a thei. A pasal kum 61 mi Antony hnenah, “Tarcak lo pitar pakhat ka kilkhawi ih norleng thawn ka nor ṭheu. A bank acount sungah 98k lenglo sumpai anei” tin a sim thei cu a pasal ih thinum anuam lo.

Cumi hnuah an innsang in Mexico khua ah holiday hmang dingin an va feh, cutawk ah Ruth Fort in sumpai a hmang ciamco ruangah a pasal in khuitawk in sumpai na nei?’ tin a sut ih Ruth in kan sungkhat pawlin in pe a ti. Antony in a zum le zum lo ding khal a thei lo ih a nupi ih cangvaihdan cu danglam a ti tuk.

Thlakhat hnuah zankhat cu an itthat laiah Ruth in a sumpai ngahnak cu a ṭongaa in a relsuak, Antony in a nupi ih ṭongaa a theih veten a bag sung ava zohsak ih pitar a kilkhawimi ih debit card a hmu. A nupi cu a thangharh ih thilumdan a sutfiah hnuah a nupi in pitar hnen ihsin debit card a ruk thu a phuangsuak.

A thaizing ah Antony cu tualsung palik sakhan ah ava feh hngal ih a nupi ih thiltuah cu a sim thei hnuah a nupi cu an kai ih thla 16 sung thawngtla dingin a thu an ṭhencat. Tualsung ṭuanvo neitu pawlin Antony cu an fak zet ih, “Na thiltuahmi hi a ṭha tuk, thiltuah harsa zet khal a si ding” an ti.

Antony in, “Ka nupi Ruth hi ka duhdawt tuk, asinan a thiltuahmi hi ka cohlang thei lo. Duhthlan ding dang ka neih lo ruangah ka report a si. Thilṭha zet ka tuah nan in soiseltu khal an um thotho. Ka nupi hi ka bawm duh” a ti. Ruth ih thiltuah mi ruangah a innsang pawl cu an riahsia zet.

Be the first to comment

Leave a Reply

Your email address will not be published.


*