Zarhhnih Sung An Duhawk Hnuah An Neiaw Hngal, “Neiawk Lohli Hi A Ṭhabik” An Ti

US fala le tlangval tuakkhat Clara Bell (kum 18) le Trey Bell (kum 20) cu zarhhnih sung lawng an duhaw ih an neiaw hngal ruangah soiseltu le faktu an tam. Nauhak lai ihsin theiaw zo an si, asinan khua dangdang ah an um ih an pehtlaihaw thei nawn lo.

An upat hnuah online fehtlang ihsin an saraw sal ih an duhaw, cutin zarhhnih sung an thlunawk hnuah an neiaw hngal. Panama tipikap ah nuamcen dingin an va feh ih Trey in neihawk a sawm ih Clara khalin a cohlang, cutin neiaw dingin an lungkim ih nazi 3 hnuah tipikap ah an neiaw hngal.

An kiangkap ah rawngbawltu pakhat arak um ih kutsihnak tuahsak dingin an sawm cu a mangbang tuk lawk nan an thinlung ngai a hmuh tikah cun ruangah kutsihnak a tuahsak cih. An neihawknak mipi an um lo, an pahnih le kutsittu lawng an si.

An nulepa, an rualpi le sungkhat pawl khalin an neiaw ti an thei lo. An neihawk hnu lawngah an sim thei ih an mangbang tuk, hitin an neiaw lohli ruangah an innsang pawl khalin an duhpi ih an cohlang.

Clara in, “Kan innsang veve kan va tong ih kan neiaw thu kan sim thei cu an mangbang tuk, thilṭha lo lam ih mangbang an si lo ih lungawi lam ih mangbang sawn an si. Mi ṭhenkhat in nan ṭhenaw lohli ding in ti nan kan thangliannak innsang ihsin ṭhenaw lohli ding kan si lo ti cu kan theifiang aw” a ti.

Online mipi ṭhenkhat in, “Zarhhnih sung lawng nan duhaw ih nan neiaw hngal cu nan ti sual si, nan ṭhenaw lohli ding. An ṭhenawk ding caan rak hngak uh” tin a phunphun in an comment ciamco. Asinan, ṭhenkhat in an lawmpi ih, “Innsang nuam zet din vivo hram uh, comment sia ngatu pawl hi an lo thik ruangah a si. Innsang dinnak ah kopawk rei le rei lo lam a si lo, thinlung lam a thupi sawn” an ti.

Be the first to comment

Leave a Reply

Your email address will not be published.


*