Tamu, Saw Bwar vengsung, ahmat (4) tlawnginn kiangah India mi 2 cu ralhrang kuthnuai ih cangvai Pyu Saw Htee pawlin an kap that. Tamil miphun an si ih kum 28 mi P Mohan le kum 35 mi M Iyarnar an si. Manipur, Moreh khua ih um an si.
Tualsung mi pakhat in, “Tamu ih um an rualpi suahcam hmang dingin an feh. An tlunlam ah tlawnginn kiangah Pyu Saw Htee pawlin an dingter. An theihthiam lo maw si ding an ding lo, bike 2 thawn an dum ih an kap that” a ti.
India mipi cu an thinheng tuk ih Moreh ah lamzawhnak an nei, Moreh ih um Kawlram mi pawl khal an thinphang ruangah Tamu ih kirsal an um. India ṭuanvo neitu in India mipi pawl cu Myanmar ram ih feh lo dingin theihternak an suah, an feh ding asikhallen tlunlam ih theihternak an lak hmaisat a ṭul.
Myanmar mipi pawl khal siannak cahnah tello in India ram lut an siang lo. Moreh ramsung ah Kawlram mi tam zet an um, ṭhenkhat cu sumdawngnak thuhla ruangih um an si ih ṭhenkhat cu CDM tuah, rambuai ruangah tlanlut khal an um.
July 6 sun ah Moreh mipi pawl cu lamzawhnak an nei ih Myanmar dawr pawl an kharter, cutawk ah buainak a suak ih Myanmar mi pahnih cu hliam an tuar. India mipi in an milesa mithi ruak 2 cu ngahsal dingin lamzawhnak an nei.
Myanmar ralhrang aiawh ih thuphuangtu Zaw Min Tun in, “Khuanu khuapa, vengsung hruaitu pawl hnenah thu kan sut ih zingzoinak kan nei, asinan ruak latu zohman an um lo. In pehtlaihtu an um lo ruangah mithi ruak 2 cu Julu 6 zinglam nazi 7:00 ah Tamu thlanmual ah kan urkang. Kan urkang hnu lawngag India, Moreh lam ihsin in rung pehtlaih fang ih India mi an si thu in sim thei” a ti.
Tualsung mipi pawlin India mi 2 kap thattu cu Pyu Saw Htee pawl an si an ti nan Zaw Min Tun cun PDF pawl an si men thei a ti. PDF Tamu khalin thu an suah cih ih ‘India mi pahnih kap thattu cu Pyu Saw Htee pawl an si, an that hnuah an sumpai le sui le ngun pawl an laksak’ tin an phuang. Ramri buainak a sosang vivo ruangah Moreh ah Indian Special Forces an thlah. July 7 sun nazi 3:30 hrawngah helicopter in Moreh an thleng.
Leave a Reply