Myanmar ramsung thuneihnak cu ralhrang pawlin an lak hnuah sumdawngnak phunphun a tlasia vivo. Tulai ah datsii man a kai ciamco, dawr ṭhenkhat ahcun zuar ding aum nawn lo.
Datsii zuar pawl khal an khawng cak tuk nan an sung sawn, an va laksal tikah an zuarmi man aiin arak khung sawn ṭheu. Myanmar san thuanthu sungah datsii man a kaibik caan a si.
Myanmar ralhrang pawl aiawh ih thuphuangtu Zaw Min Tun in, “Leitlun huap in datsii man a kai thluh, kannih in kan va control thei lo. Kan ramsung ih datsii man aiin kan ram kiangkap ram pawl ih an zuar mi datsii man hi a khung sawn. Himi ihsin a theihtheih, leitlun huap in datsii man a kai” a ti.
Ralhrang pawlin datsii phur lawng tumpi 12 a thleng cing ding thu an phuang. ‘Ramsung ah datsii a cem lo, dawr ṭhenkhat in datsii an nei nan an zuarsuak duh lo. Kan va zingzoi dingih datsii zuarsuak duh lo an silen hremnak kan pe ding’ a ti.
Datsii zuar pakhat in, “Datsii cu kan duh vekin kan la thei lo, zuar ding khal aum nawn lo. Veikhat datsii la dingah ni tampi sung kan hngah a ṭul, datsii cu kan ngah asilen nihnih nikhat ah a cem cih. Zuar ding aum lo cun hremnak in pe asikhallen ti thei mi kan nei lo” a ti.
Leave a Reply